Шалпык эшегине тетири минип алып келе жатса, андан тааныштары сурайт экен:

- Шаке, мунуң эмне... оң эле карап минбейт белең?

- Э-е... эмнесин айтайын?.. Мас болуп калып, эшегиме кылбаганды кылган экем. Азыр уялганымдан, эшегимдин бетин карай албай баратам.

***

Бир киши врачка кайрылат:

- Доктур, мен импотент болуп калган окшойм. Аялымдын койнуна жатканда таптакыр делебем козголбой атат.

- Аялыңызды ээрчитип келиңиз.

Талап аткарылат. Врач эркекти сыртка чыгарып жиберет да, аялды текшере баштайт:

- Канаке, чечиниңизчи... Ооба, баарын... Эми жатыңыз... чалкаңыздан... Та-ак... кырыңыздан... нары оодарылыңыз... көмкөрөңүздөн... кайра чалкаңыздан... Эки бутуңузду “прямо” асманга көтөрүңүз... Мм-м, түшүнүктүү... Кийине бериңиз... Кийиндиңизби? Сыртка чыга берсеңиз болот. Күйөөңүз кирсин.

Тиги аялдын күйөөсү киргенден кийин, врач минтет дейт:

- Күнөө сизде эмес экен. Менин деле делебем козголбой койду.

***

Аялы күйөөсүнө өтүнөт:

- Ваннадагы суу түтүгү бузулуп калыптыр. Андан тамчылаган суу астыңкы кабаттагыларды да беймаза кылчуудай. Ошон үчүн тамчыга тепши коюп койдум. Оңдоп койсоң боло.

- Эм-не-е?.. Көзүңдү чо-оң ачып туруп, анан сүйлөп жүргүн, сволуч! Мен сага слесарь белем?

Күйөөсү эртеси келсе, суу түтүгү оңдолуп калыптыр.

- Ким оңдоп берди?

- “Вечерний Бишкек” гезитиндеги реклама аркылуу слесарь чакырттым.

- Оңдоп бергени үчүн кө-өп акча алдыбы?

- Бир тыйын да алган жок. “Тиги керебетке мени менен жат, же ырдап бер” деди.

- Сен ырдап бердиңби?

- Мен, эмне, ырдап жүрчү белем?

Тапан МАДЫРАБАШ, “Майдан. kg” гезити