Бул тууралуу Reuters агенттигине Өзбекстан коопсуздук кызматындагы булак билдирди.

Агенттиктин билдиришинче, шектүү Рахмат Акилов – этникалык тажик. Швецияга келгенден кийин ал “Ислам мамлекети” экстермисттик тобунун таасирине кабылган. Ал түрк-сирия чек арасында кармалып, качкын макамы болгондуктан кайра Швецияга депортацияланган.

Быйыл февралда өзбек укук коргоо органдары Акиловду диний экстремизмге айыптап, эл аралык издөөгө берген.

Ekot швед радиосу кабарлагандай, Акилов динге деле өтө берилген эмес, бирок Стокгольмдун четиндеги көмүскө иштеген мечитке барып турган.

39 жаштагы өзбекстандык жаран башкарган жүк ташуучу автоунаа 7-апрелде Стокгольмдо элди тебелеп, соода борбордун имаратын сүзүп өрттөнүп кеткен. Курулушта иштеген Акилов качып кетип, ошол эле күнү кармалган. Окуядан төрт адамдын өмүрү кыйылып, он беши жараат алган.