Бишкек шаарынын мэриясы "Коомдук саламаттык сактоо жөнүндө" мыйзамына өзгөртүүлөрдү киргизүү жөнүндө" мыйзам долбоорун коомдук талкууга алып чыкты.
Документ жарандардын коомдук тамактануу жана тейлөө объекттериндеги санитардык-гигиеналык жайларга (ажатканалар) бекер жана акысыз кирүүсүн камсыздоого багытталган.
Түшүндүрмөдө белгиленгендей, бул демилге санитардык маданиятты жогорулатууга, калктын саламаттыгын коргоого жана элементардык санитардык кызматтарга жетүүдө бирдей шарттарды түзүүгө багытталган. Мэрия кафелерде, соода борборлорунда жана башка коомдук объектилерде дааратканаларга кирүүгө чектөө коюу жарандардын, өзгөчө аялуу категориядагы адамдардын — улгайган адамдардын, балдардын, кош бойлуу аялдардын жана ден соолугунан мүмкүнчүлүгү чектелген адамдардын негизги санитардык укуктарын бузарын баса белгилейт.
Мыйзам долбоору "Калктын саламаттыгы жөнүндө" мыйзамынын 17-беренесин мамлекеттик объектилердин менчик ээлеринен жана ижарачыларынан мекеменин кардарлары болгонуна карабастан бардык адамдардын дааратканага тоскоолдуксуз жана эркин кирүүсүн камсыз кылууну талап кылган жаңы пунктча менен толуктоо сунушталууда.
Ошол эле учурда коммерциялык кызматтарды көрсөтүү үчүн атайын иштелип чыккан акы төлөнүүчү санитардык жайлардын болушу мүмкүндүгү сакталууда.
Түшүндүрмөдө бир катар коомдук объекттерде коддук кулпулар же кирүүнү чектөөчү башка каражаттар орнотулуп, бул объекттердин кардарлары болбогон адамдардын даараткананы эркин колдонуу мүмкүнчүлүгүн жокко чыгарат. Табигый физиологиялык муктаждыктарды өз убагында канааттандырбоо заара-жыныс жана тамак сиңирүү системаларынын бузулушуна алып келиши мүмкүн, бул коомдук ден соолуктун абалына түздөн-түз таасирин тийгизет.
Долбоор КР Конституциясынын ден соолукту коргоого, жагымдуу айлана-чөйрөгө, адамдын кадыр-баркына кепилдик берген беренелерине ылайык иштелип чыккан.
Мыйзам долбоору мамлекеттик бюджеттен кошумча чыгымдарды талап кылбайт. Норманы аткаруу милдети коомдук объектилерге ээлик кылган же ижарага алган юридикалык жактарга жана жеке ишкерлерге жүктөлөт.
Бишкек мэриясы ошондой эле шаарда бюджеттин жана жеке өнөктөштөрдүн инвестицияларынын эсебинен коомдук дааратканаларды куруу жана орнотуу иштери жүрүп жатканын, бирок бул чаралар борбордун өсүп жаткан калкынын муктаждыктарын канааттандыруу үчүн жетишсиз экенин эскертти.
Бул түзөтүү Дүйнөлүк саламаттык сактоо уюмунун (ДССУ), БУУнун Калктуу конуштар программасынын (БУУ-Хабитат) принциптерине жана Туруктуу өнүгүү максаттарынын № 6 "Таза суу жана санитария" максатына шайкеш келет.
Мыйзамдын кабыл алынышы жаңы талаптарга ылайык келтирүү үчүн санитардык-эпидемиологиялык эрежелерди оңдоону талап кылат.
Булак: Кабар