Депутат Талаайбек Сарыбашев парламент жыйынында ооруканаларда кезек күтүүлөрдүн көптүгүнө байланыштуу маселени көтөрдү. 

Ал Ош облустук балдар ооруканасында кезекте 200-300 бала тураарын белгиледи. 

"Биз журналисттерге жана блогерлерге медицинадагы көйгөйлөрдү чагылдырып турганы үчүн рахмат айтышыбыз керек. Оштогу балдар ооруканасында аймактардан келген 200-300 чакты бала дарыгерде кезекте турушат. Облустардагы медицинанын маселелерине көңүл бурулса жакшы болмок", - деди депутат. 

Ошондой эле, ал саламаттыкты сактоо министри аймактарга барганда дарыканаларды ачып коюп эле кетип калаарын белгиледи. "Баланын ден соолугунан өткөн маанилүү нерсе барбы?" - деген депутат аларды дарылоого эмнеге татыктуу көңүл бурулбай жатканына кызыкты. 

Сарыбашев саламаттыкты сактоо министрин парламент жыйынына чакырууну сунуштады.