Жогорку Кеңешке экс-президент Алмазбек Атамбаев чакырылды. Бүгүн,  17-июнда экс-президент Алмазбек Атамбаевди кол тийбестик статусунан  ажыратуу боюнча түзүлгөн депутаттык комиссиянын жыйыны болот. Жыйынга экс-президент  же анын өкүлү катышуусу керектигин белгилеген депутаттар, аларга чакырык беришкен. 

Депутаттык комиссия 13-июнда түзүлүп, курамына төмөнкү депутаттар кирген: 

- КСДП фракциясынан:  Өмүрбек Бакиров, Евгения Строкова, Кожобек Рыспаев, Максатбек Эгембердиев;

-«Республика-Ата журт» фракциясынан: Талант Мамытов, Бактыбек Райымкулов, Жыргалбек Турускулов;

-«Кыргызстан» фракциясынан: Канат Исаев, Алмазбек Токторов;

-«Өнүгүү-Прогресс» фракциясынан: Алтынбек Жунус уулу;

-«Бир Бол» фракциясынан: Бактыбек Турусбеков;

-«Ата Мекен» фракциясынан: Каныбек Иманалиев мүчө болгон.

8-июнда Атамбаев "Форумдун" алдына митинг өткөрүп, депутаттарды "чимкирик" атап, сын айткан. Буга териккен эл өкүлдөрү парламент жыйынында экс-президенттин билдирүүлөрүнө жооп катары, аны экс-президенттик статустан ажыратуу демилгесин көтөрүп чыгышкан.