Эске салсак, кечээ 25-мартта саясатчы Садыр Жапаровдун Кыргызстанга кайтып келишине байланыштуу Бишкектин Горький аянтында аны колдоо митинги болмок. Алдын-ала билдирилгендей, митингге Кыргызстандын бардык булуң-бурчтарынан эл келип чогулган. Булардын арасында атайын чет өлкөлөрдө иштеп жүргөн жеринен келген мекендештерибиз да бар.

Садыр Жапаровду МУККнын кызматкерлери кыргыз-казак чек арасындагы “Ак Жол” постунан тосуп алышып, митингге бардырбай, дароо кармап кетишкен. Ошого байланыштуу, Горький аянтындагы митинг МУККнын имараты тарапка көчкөн. Ага миңге чукул адам катышып, Садыр Жапаровду тезинен коё берүү талаптары жаңырган. Эки ирет активдүү митингчилер милициянын курчоосун жарып өтүү менен МУКК имаратын көздөй жулунушкан.

Жыйынтыгында милиция менен элдин ортосунда кагылышуу орун алып, атайын каражаттар колдонулуп, митингчилер кубаланган. Абага ок атылган. Элди карай көздөн жаш агызуучу газ ыргытылган.

ИИМ ушу тапта 105 митингчи кармалганын кабарлап, алардын ичинен 64ү “бейбаштык”, “бийлик өкүлүнө карата күч колдонуу”, “бирөөнүн мүлкүнө зыян келтирүү” багытында күнөөлүү деп табылып, 2ден 5 суткага чейин камакка алынышкан. Алар Биринчи май райондук ИИБнин убактылуучу кармоочу жайында кармалышууда. Ошондой эле,12 митингдин эң активдүү катышуучусу Бишкек ИИБнин убактылуу кармоочу жайына камалганы айтылды. Дагы 12 адамга айыппул салынып, бошотулду.

Мындан тышкары, митингчилерге каршы “Ясинь” автобусунун айдоочусу кайрылган Анын айтымында, ызы-чуу орун алган учурда митингчилер автобустун эшик-терезелерин талкалап салышкан. Учурда ага байланыштуу видеоматериалдар изилденип, күнөөлүүлөр такталууда.

ФОТО -  http://zanoza.kg/354631