Атамбаевдин тегерегинде үч топтун: Жээнбековдор, Исаков-Ниязов-Сегизбаев жана Икрам Илмияновдун өз ара таасир талашып жатканы тууралуу маалыматтар чыккан
Бийлик партиясы – КСДПнын ичинде ынтымак кеткени буга чейин эле белгилүү болгон. Азыр анын кейпи чөгүп бараткан кемеге окшош. Ошондуктан да андан “келемиштер” качып түшө баштады. Бул да КСДПда масштабтуу тазалоо башталганынан кабар берип турат.
Өткөн жумада КСДП фракциясынын депутаты Узарбек Жылкыбаев КР Өкмөтүнүн Ысык-Көл облусундагы өкүлү болуп дайындалган. Анын кетиши менен бошогон депутаттык орун тизме боюнча кезекте турган Икрамжан Илмияновго тийиши керек эле.
И.Илмиянов Лейлектин кулуну. Атамбаев Бакиев бийлигине оппозицияда жүргөн кезинде жакын санаалаштары бүт сатып кетсе да бул жигит жардамчысы жана шоопуру болуп, аягына дейре колдогон. А.Атамбаев бийликке келген соң анын президенттик аппаратын тейлеген. Ошондон улам, “Кыргызстандагы бардык кадр маселесин Атамбаевдин шоопуру чечип жатат”,- деген күмөн саноолор жаралган. Анткен менен Икрамжандын билими жогорку экенин эске салып коёлу.
Коомчулукта И.Илмияновду экс-канзаада Максим Бакиев менен салыштыргандар да бар. Бирок азырынча ал сөз бойдон гана калууда жана аны тастыктаган фактылар, далилдер коомчулукка сунушталган жок. Мурунку шоопурдун таасири көбүртүлүп жатабы, айтор, айрым булактар И.Илмиянов ЖКга барары менен КСДП фракция башчысы болуп шайланып, Иса Өмүркулов өз ишин мыктылап алып бара албаган Ч.Турсунбековдун ордуна спикер болорун божомолдоп ийген болчу. Бирок, көп өтпөй Икрамжан өз ыктыяры менен депутаттык мандаттан баш тартканы кабарланды. Бул өз кезегинде “Икрамжан Атамбаевдин ишениминен чыгып калыптыр”, “Илмиянов бийликтин кулап баратканын илгертпей сезип, өзүн ала качты”- сыяктуу имиштердин чыгышына себеп болду. Чындап караганда, буга чейин да Атамбаевдин тегерегинде үч топтун: Жээнбековдор, Исаков-Ниязов-Сегизбаев жана Икрам Илмияновдун өз ара таасир талашып жатканы тууралуу маалыматтар чыккан. Бул жагынан алып караганда Сапар Исаковдун тобу күчтүүлүк кылып жаткандай, анткени ал жакында президенттик аппарат жетекчиси болуп дайындалып, “мураскерликке” чоң кадам таштады. Балким, ушу кадамы Икрамдын жандүйнөсүн эзгендир. Кантсе да канча кыйынчылыкта чогуу болгон лейлектин балбан президенттен мындай кадамды күтпөсө керек.
Икрамжандан кийин КСДП тизмесинде турган Абдыманап Кутушевди да жолотушкан жок. Жакында эле өз партиялаш депутаттары тарабынан “ичип жеп алды”- деген кине коюлуп, парламенттин Иш башкармалыгынан кетирилген Кутушев “өз бала” статусунан ажырап тыныптыр. Ал да өз каалоосу менен БШКга тизмеден чыгуу арызын тапшырыптыр.
Ошентип, депутат болуу бактысы акыркы кезде президент Атамбаевдин сын бутасына айланган “Азаттык” радиосунун журналисти Аида Касымалиевага буйруганы калды окшойт. Ал тизмеден чыкпай тургандыгын жар салды. Аны “чык” деп айтууга деле ооздору барбастыр, анткени “Азаттыктын” журналистине минтишсе, ал дароо саясатка айланып, КСДПга дагы минус болот.
Булак: “Майдан.kg” гезити, №10 (288), 21.03.2017-ж.