"Биздин мамлекетти агрардык өлкө", деп мактанганыбызга алган багытыбыз канчалык деңгээлде жооп берээрине  Жогорку Кеңештин  депутаты Бейшеналы Нурдинов “Парламент” радиосунда берген маегинде ой толгоду.

Депутаттын айтымында, эл арасында карышкыр атып алгандарга 6 миң, чөөнү жок кылгандарга 2 миң сом сый акы берилчү. Азыр ушул сумманы жогорулатуу талабы коюлууда. Карышкыр аткандарга 10 миң, ал эми чөөндөн куткаргандарга 5-6 миң болсун, - деп сунушталууда.

"Аркар, кулжалар көбөйгөндө, карышкырлар да капталдан чыгып, катарын көбөйтүүдө. Эгер жаратылыштагы жапайы жаныбарларды сактайлы, - десек тартипти тең орнотуу зарыл. Мисалы, аркар, кулжа атып алгандарга салына турган айып бери жагы 10 миң доллар. Ал эми аларга кол салган жырткычтарды атып алганың үчүн сый акы болуп – болбогон акча. Ошондуктан, айбаттуу жаныбарлардын жайыттарга жай баракат кирип келишине каршы турган мергенчилердин мээнетин адилет баалоо керек", - деди депутат.

“Бул боюнча тиешелүү токтом даярдалды. Эми ага ылайык, карышкыр аткандарга каралган сый акы 10 миң, чөөлөргө 5 миң, бөлтүрүктөргө 2,5 миң сом төлөнөт. Ал эми алардын териси баалуу, эти шыпаа болгондуктан, алар ошол мергенчинин менчигинде кала берет”, - деп маалымдады.