БШК 30-ноябрда өткөн Жогорку Кеңештин депутаттарын мөөнөтүнөн мурда шайлоого катышкан талапкерлердин шайлоо өнөктүгүнүн каржылоосу тууралуу жалпы маалымат таратты. Бул тууралуу "Govori.tv" маалымат агенттиги жазып чыкты.
Анда айтылгандай, бир мандаттуу шайлоо округдары боюнча талапкерлер өз-өзүнчө, ал эми 9 талапкерди көрсөткөн “Ынтымак” саясий партиясы чогуу шайлоо фонддорун түзүштү.
БШКнын сайтында айтылгандай, 29-ноябра карата алынган банктык маалыматтарга ылайык талапкерлердин жана саясий партиянын шайлоо фонддорунун атайын эсептерине түшүүлөрдүн жалпы суммасы 1 млрд. 791 млн. сомду түздү, анын ичинде:
- талапкердин өз каражаттары – 1 млрд. 092 млн. сомду;
- саясий партиянын өз каражаттары – 3, 797 млн. сомду;
- жеке жактардан түшкөн ыктыярдуу салымдар – 659,063 млн. сомду;
- юридикалык жактардан түшкөн ыктыярдуу салымдар – 13,208 млн. сомду түздү.
Бул сумманын ичинен 1 млрд 582 млн сом шайлоодогу үгүт иштерине сарпталды. Калган 147 млн сомдон ашыгыраак каражат шайлоо төгүмүн төлөөгө жумшалды.