Кыргызстандын түштүк аймагындагы эң чоң деп эсептелинген бул логистикалык борбордо картошка, пияз, сабиз, кызылча сыяктуу тамырдуу жашылчалаларды тазалап, сорттоп, анан таңгактоого чоң мүмкүнчүлүк бар.Сыйымдуулугу – 6 миң куб метр. Күнүнө 10 миң тонна жашылчаны даярдайт.
Баса, логистикалык борборду жеке ишкер Аваз Абдурахимов ЮСАИД уюмунун колдоосунда түптөгөн. 14-июнда өткөн ишкананын ачылыш аземине АКШнын Кыргызстандагы элчиси Шейла Гуолтни катышты.
- Азырынча борбордо 10 адам гана эмгектенет. Бара-бара жумуш жолго коюлса дагы 50 адам жумуш менен камсыз этилет. Ишкана жашылчаларды сорттоп-таңгактап тим болбой, түшүмдү жеринен казып келе турган техникалары менен да мактана алат, - деди жеке ишкер Аваз Абдурахимов.
Баса, жеке ишкер Аваз Абдурахимов айыл чарба жаатын анализдеп чыккан соң, логистикалык борборду дыйканчылык кеңири жайылган Араван районунда ачууну чечкен. Ишкана кийинки жылдан Ош, Жалал-Абад жана Баткен облустарындагы дыйкандар менен келиши түзүүнү жана андан ары ЕАЭБ рыногуна чыгууну дагы көздөп жатат.
Булак: «Майдан. kg» гезити