Кыргызстандын Германиядагы жана аны менен катар Финляндиядагы элчиси Өмүрбек Текебаев Мамлекеттик салык кызматынын төрагасы Алмамбет Шыкмаматов тууралуу соцтармактагы баракчасына жазып чыкты. 

Элчинин "Алмамбеттин «Алтын шаарга» сапары" деп аталган пикиринде учурда Кыргызстанда салык системасында жасалып жаткан алгылыктуу иштерге басым жасалган. 

20-январда Алмамбет Шыкмаматов Италияда өткөн Дүйнөлүк ювелирлер жарманкесинен кийин түз эле Германиянын Пфорцхайм шаарына учуп келди. Бул сапар жөн эле эмес — ал Президенттин зергерчилик тармагын колдоо тууралуу Указын ишке ашыруунун алкагында жасалды.

Пфорцхайм — Германиядагы ювелир тармагынын борбору, эл ичинде «алтын шаар» деп аталган өнөр жай очогу. Германияда өндүрүлгөн ювелирдик продукциянын 80 пайызга жакыны дал ушул шаарда чыгарылат.

Бул шаар — жөн гана фабрикалардын жыйындысы эмес. Бул жерде муундан муунга өтүп келген салт, тактыкка негизделген немис мектеби, дизайн менен технологиянын айкалышы жашайт. Пфорцхаймда ювелирчилик — жөн гана кесип эмес, маданият, ал эми сапат — атаандаштык эмес, норма.

Алмамбеттин негизги миссиясы — Кыргыз Республикасынын Президентинин зергерчилик тармагын колдоо тууралуу Указын тааныштыруу, анын маңызын жана логикасын түшүндүрүү, ошондой эле жергиликтүү ювелирлерди Кыргызстан менен түз жана узак мөөнөттүү кызматташууга чакыруу болду.

Президенттик Указдын өзөгү жөнөкөй, бирок стратегиялык. Геологиялык запастары жана өндүрүш көлөмү боюнча Кыргызстан дүйнөдөгү алтын өндүрүүчү өлкөлөрдүн катарына ишенимдүү кирет. Бирок ондогон жылдар бою биздин алтындын негизги бөлүгү өлкөдөн чийки зат түрүндө — куйма жана металл катары чыгып келди.

Алтын — бул жөн гана чийки металл эмес, улуттук өндүрүш маданиятынын негизи болушу керек. Ал жумуш орундарын, технологияларды, устачылык мектептерин жана өлкөнүн экспорттук аброюн жаратат. Мамлекет алтынды казып алып сатуу менен чектелбестен, аны өлкө ичинде кайра иштетип, жогорку кошумча нарк жараткан тармакка айлантууну приоритет катары аныктады. Бул убактылуу чара эмес — узак мөөнөттүү, туруктуу өнөр жай багыты.

Указдын маанилүү өзгөчөлүгү — жаңы саясаттын регулятору катары Салык кызматынын аныкталышы. Бул тармакта басым жазалоого эмес, жөнгө салууга, жөнөкөйлөтүүгө жана көмүскөдөн чыгарууга коюларын билдирет. Башкача айтканда, салык системасы бул жерде тоскоол эмес, өнүгүүнүн инструменти катары каралууда.

Жолугушуулардын жыйынтыгында конкреттүү практикалык макулдашууларга жетишилди. Германиялык ювелирлердин делегациясы май айында Кыргызстанга иш сапары менен келүүгө, кызматташуу тууралуу меморандумга кол коюуга, ошондой эле зергерчилик жана ага байланышкан өндүрүш тармактарынын өкүлдөрү катышкан бизнес-форум өткөрүүгө кызыкдар экенин билдиришти. Бул — сөздөн ишке өтүүнүн ачык белгиси", - деп жазды Текебаев.