“Ош окуясы чагылгандай тез болуп, кайра тез токтоду. Анткени, эки улуттун эли бул уруштан көп нерсе жоготоорун, жаңжалдын от алуусуна кимдер тарабынан шыкак берилип жатканын, уюштуруучусу ким экенин тез түшүнүп, тез эсине келди. Эгер бул уруш эки улут арасындагы көп жылдар топтолгон нараазычылыктан улам от алган болсо, мынчалык тез токтомок эмес”,- деген оюн Ош шаарынын мэри “Майдан.kg” гезитинин бүгүнкү санында жарыяланган маегинде билдирген.

М.Мырзакматовдун айтымында, согуш бир нече күн эмес, бир саат болсо да кандуу изин калтырбай койбойт: Ошто канча имараттар өрттөлдү, кырчындай өмүрлөр кыйылды, энелер кара кийип, эзелтен тирүүлүктө базары, өлсө мазары бир эки элдин ортосунда кан акты. Жараат оор, жарака терең. Бул жараатын бир-эки жылда бүтөлүшү кыйын. Токсонунчу жылдын күйүтү эми гана сууганда кайра жаңырып, эл азыр акыл-эс, сабыр менен гана өзүн токтотуп, бири-бирине аяр мамиле кылууга аракеттенип жатат. Бул жараканын жок болуусуна убакыт керек, баарын улукман мезгил гана дарылай алат”.

Гезиттин улутчулдук позициясы тууралуу суроосуна М.Мырзакматов мындайча жооп узаткан: “Бир жыл бою мен тууралуу эмнелерди гана жазышпады, башкача айтканда төө бастыга куп эле алышты. «Бандит, басмачы, касапчы, наркобарон» деп батыштын Интернет сайттары жазып, аларга кошулуп биздин жергиликтүү басма сөз, тагыраак айтканда сатылган «сары пресса» алынын жетишинче аларга кошулуп шыбады. Алар кыргыздын бир жигитин чөгөлөтүп, элим деген духун майтарганга аракет кылышты. Мунун баарына бир жыл бою унчукпай чыдадым, бир чети иттерге кошулуп үргөнгө убактым да болгон жок. Биринчи жолу жакында «Эркин Тоо» гезитине түз байланышка чыгып, олуттуу, жооп бергенге татыйт деген суроолорго жооп бердим. Себеби, мезгил келди деп ойлойм. Буга чейин менин үнүмдү чыгарбай басып, көкүрөк кыйкырыгымды угузбаганга жакшы эле күч жумшашты”.