Кыргызстандын экс-президенти Алмазбек Атамбаев "Апрель" телеканалына кеңири маек куруп, ар кандай суроолорго жооп берди. Суроолордун арасында учурдагы президент Сооронбай Жээнбековдун президенттикке талапкер учурунда шайлоо штабындагы иш аракеттер тууралуу да айтылган. Маек бүгүн, 19-ноябрда эфирден кетиши керек. Азырынча, маектин айрым үзүндүлөрү жарыяланды.
Жакында президенттин шайлоо учурундагы шайлоо штабына которулган каражаттар боюнча документ жарыяланган. Атамбаев ал Икрамжан Илмияновдун камалганына байланыштуу ачыкка чыкты деп эсептейт. Ошондой эле, айтымында, штабдын бухгалтери башка өлкөгө чыгып кетти, анткени өз өмүрүнөн кооптонууда.
"Каражаттарды штабдын бухгалтери билчү. Ал өз эсебинен эмгек эргүүсүнө чыгып, бүгүнкү күндө башка өлкөдө жүрөт. Ал өзүнүн өмүрүнөн кооптонуп жатат, анткени бүгүнкү бийлик Бакиевдин жолу менен баратат деп ойлойм", - деген Атамбаев.
"Икрамжан Илмияновду камашты. Эгер аны камашпаганда бул документтер да ачыкка чыкпайт болчу", - деп белгилеген экс-президент.
Жарыяланган документтерге ылайык, шайлоо учурунда Сооронбай Жээнбековдун шайлоо штабы мыйзамды бузганы белгилүү болгон. Шайлоо алдындагы үгүт иштерине расмий 158 миллион сом коротулду деп жазылган болсо, документтерде чыгым 1,1 миллиард сомго жеткени көрсөтүлгөн.