Бүгүн Ош базарында иштеген чакан жана орточо соода жүргүзгөн ишкерлерден, дүн продукция алып келчү дыйкандар, Бишкектин бул базарына эл ташуучу маршруттук каттамдардын айдоочуларынан түзүлгөн иш таштоо комитети Жогорку Кеңештин депутаттарына, президент Роза Отунбаевага кайрылуу жолдошту. Анын түп көчүрмөсүн “Саясат.kg” порталына комитеттин төрагасы Назарбек Нышанов коомчулукка тааныштыруу иретинде жолдоду.
Кайрылуунун негизги талабы – Ош базарынын тегеригендеги ыплас оюндарды токтотуу жана Бишкек мэри Иса Өмүркуловду, Ленин районунун акимин токтоосуз кызматтан алуу. Бул талаптарды комитет 4-майдагы басма сөз жыйынында да билдирип, 10 күн ичинде бийлик бул маселени чечпесе, мөөнөтсүз митинг башталарын жар салышкан.
Н.Нышанов билдиргендей, бийлик элдин үнүн уккан жок, андыктан талаптардын аткарылышы күмөндүү. Ошол себептүү митингди 14-майда баштоого камылга көрүлүүдө.