Мамлекеттик мунай-газ гигантынын 2025-жылдагы чыгымдарынын жарымы башкаруудагы каталардан улам келип чыккан

КР Эсептөө палатасынын кеңеши өлкөнүн негизги стратегиялык ишканаларынын бири — «Кыргызнефтегаз» ААКсында жүргүзүлгөн ири аудиттин жыйынтыгын чыгарды. 2025-жылга карата каржы-чарбалык ишмердүүлүктү текшерүүдө 967,8 миллион сомдук мыйзам бузуулар жана системалык кемчиликтер аныкталды.

Аудитте белгиленгендей, компаниянын бюджетине негизги соккуну натыйжасыз жетекчилик урган. Өндүрүштүк чечимдердин өз убагында кабыл алынбагандыгынан улам, «Кыргызнефтегаз» ААКсы өзү жана анын туунду түзүмү 495 миллион сом өлчөмүндөгү пайдадан куру калган.

Мыйзам бузуулардын көлөмү боюнча экинчи орунда кадр саясаты турат. Аудиторлор эмгек акы фондунда 281,4 миллион сом эрежелерди олуттуу түрдө бузуу менен бөлүштүрүлүп, таризделгенин аныкташкан. Мындан тышкары, компаниянын жетекчилиги карызкорлор менен иштөөнү иш жүзүндө көңүл сыртында калтырган, анткени 120 миллион сом өлчөмүндөгү дебитордук карыз ушул күнгө чейин өндүрүлгөн эмес.

Учурда милдеттүү түрдө кайтарылууга тийиш болгон 135,9 миллион сомдун 8,9 миллион сому гана казынага кайтарылды. 

Эсептөө палатасы ААКтын жетекчилигине коомдун кирешесине 126 миллион сомдон ашык каражатты кайтаруу талабы менен расмий эскертүүлөрдү жөнөттү. Бирок иш ички териштирүүлөр менен гана чектелбейт — аудиттин бардык чогултулган материалдары кылмыш ишин козгоо жана топ-менеджменттин иш-аракеттерине укуктук баа берүү үчүн укук коргоо органдарына өткөрүлүп берилет.