Бишкек, "САЯСАТ.KG". Бул тууралуу бүгүн КР УКМКнын басма сөз борбору маалымдады.

КР УКМК тарабынан «Айыл чарба багытындагы жерлердин мамлекеттик фондунун» жер тилкелерин жеке менчикке мыйзамсыз чыгарып кетүү фактыларын аныктоо, бөгөт коюу жана алдын алуу боюнча жүргүзүлүп жаткан иш-чаралардын алкагында Москва районунун Нарзан айыл өкмөтүнүн жана «Жер ресурстары, кадастр, геодезия жана картография боюнча мамлекеттик агенттиктин» Москва району боюнча бөлүмүнүн мурдагы жана иштеп жаткан кызмат адамдары жетектеген «жер мафиясы» деп аталган кылмыштуу топтун ишмердүүлүгүнө бөгөт коюлду.
       «Коррупция» жана «кызмат абалынан кыянаттык менен пайдалануу» фактылары боюнча козголгон кылмыш ишинин алкагында Чүй облусунун Москва районунун Нарзан айылдык кеңешинин төрагасы «К.Т.К.» айрым кызмат адамдары менен жең ичинен келишип алып «Айыл чарба багытындагы жерлердин мамлекеттик фондуна» тиешелүү болгон жер тилкелери боюнча 2013-жылкы картографиялык иш кагаздарын жасалмалагандыгы аныкталган. Жасалма иш кагаздардын негизинде жалпы аянты 16,84 га болгон айыл чарба багытындагы жер тилкелери мамлекеттин менчигинен мыйзамсыз чыгарылып, «К.Т.К.»нын жана ага тиешелүү болгон тараптардын пайдасына жеке менчик жерлери катарында таризделген.  
       Жүргүзүлгөн тергөө-ыкчам иш-чараларынын жыйынтыгы боюнча, кылмыштуу схеманын уюштуруучучу «К.Т.К.» кармалып, КР УКМКнын тергөө абагына камакка алынды.
       Учурда кылмыштуу схеманын баардык катышуучуларын аныктоого, «Айыл чарба багытындагы жерлердин мамлекеттик фондуна» тиешелүү болгон жерлерди мыйзамсыз ээликтен чыгаруу боюнча дагы башка фактыларды аныктоого, ошондой эле келтирилген зыяндын көлөмүн тактап, ордун толтурууну камсыз кылууга багытталган бир катар тергөө-ыкчам иш-чаралары жүргүзүлүүдө.