Подробности
Категория: Алдын ала талдоолор
Просмотров: 2320

Акыркы убакытта бардык министрлик жана агенттиктерде ар кандай текшерүүлөр жүрүп жатат. “Деги эле текшерүүнүн максаты эмнеде?” деген суроолор жаралбай койбойт. Балким, мамлекеттик мекемедеги паракор жана өзүнүн капчыгын ойлогон башчылардан арылуу болсо, экинчиден ошол иликтөө иштерин өткөзүү шылтоосу менен өзүнүн кызматкерлерин кызматка коюуну элестетет. Жакынкы арада эле көз карандысыз эксперттер жана эл өкүлдөрүнүн курамындагы комиссия мамлекеттик курулуш жана аймактык өнүгүү агенттигинин жана Бишкек шаардык башкы архитектура башкармалыгынын ишмердигине баа берүү максатында иликтөө иштерин баштады. Бул комиссиянын курамындагы адамдарга ким эксперт деген макамды бергени дагы түшүнүксүз. Текшерүү кимдер тарабынан өтүп жатканы тууралуу жалпы журтка так жана далил маалымат берилген эмес. Учурдан пайдаланып,  көз карандысыз эксперттердин буга чейинки ишин талдоону жана тактап көрсөтүүнү туура деп билдик.
 
Комиссиядагы көз карандысыз эксперттер:  У.Д. Бекишев, Б.Т.Тукаев, Гавриленко, С.А. Султанов,  Т. Мырзакулов.
 
Эми алардын ишмердүүлүгүнө токтоло кетсек, У. Д Бекишевдин  ысымы жалпы журтка таандык болбосо дагы, архитектура тармагындагыларга аттын кашкасындай белгилүү. Маселен, Бекишев мырза 2006- жылдан бери КР курулуш жана архитектура агенттигинде статс-катчы кызматын ээлеп келген. Жупуну сөз менен атаганда биринчи орун басар. Үстүбүздөгү жылдын март айында аркалаган кызматынан бошогон. Эң кызыгы, ушунча убакыт статс-катчы кызматын аркалап, «балык» болуп келген Бекишев качан гана жумушунан айрылган соң гана акыйкаттыкты,чындыкты көтөрөйүн деп чечкенби? Же бул убакытка чейинки чиновниктерде «мода» болуп калган жолго түшкөнбү айтор, түшүнүксүз. Убагында агенттиктин ишинин баарын колдоп келген Бекишев мырза эми кылган ишин кантип баалоого болот? Анысы аз келгенсип, эми кайра өз орду көз алдынан учуп, өзүнө-өзү көрсөтмө жазып алып, экс-коллегаларынын колун топтоо менен убара.
 
Эксперттердин дагы бир мүчөсү Тукаев Б.Т. Кезегинде Ысык-Көл облусунун курулуш жана архитектураны көзөмөлдөө башкармалыгынын жетекчиси болуп иштеген. Азыркы убакта жумушсуз. Көлдө жүргүзүп келген ишмердүүлүгүндөгү шалаакылыгынын айынан азыркы убакытка чейин кылмыш иштери «салаңдап» келатканы-келаткан. 7-апрелдеги революциядан соң, Тукаев мырза архитекторлор союзунун жыйынында өзүн-өзү Бишкекбашархитектура башкармалыгынын башчылыгына көрсөткөн. Тилекке каршы, колдоого ээ болгон эмес. Бир убакта бир тууган карындашы Бишкекбашархитектура башкармалыгында  иштеген жана белгилүү болгондой пара алып жаткан жеринен ички иштер кызматкерлеринин кылтагына илинген. Карындашын тарбиялап, паракорчулукка каршы жакшы «опыт» алганбы айтор, байкебиз дагы «вообще» көз карандысыз эксперт.
 
Рейтингибиздин 3-орунунда Гавриленко айым менен С.А. Султанов мырза турат. Баарыбыз билгендей, бир убакта иш алып барышкан Султанов мырза Бишкекбашархитектура башкармалыгынын башчысы болсо, Гавриленко айым бир бөлүмүн жетектеген. Дал ушул  «дуэттин» убагында шаарыбызда башаламан жолдор менен жер басып алуулар жана мыйзамсыз жер сатуулар гүлдөгөн. Султанов мырза мэриянын коллегалык чечимине ылайык жумуштан бошотулган.
 
Ал эми Гавриленко айым шефи кеткен соң артынан ээрчип, Султановдун жеке долбоорлук компаниясына жумушка кирген. Кээ бир маалыматтарга ылайык, мыйзамсыз массалык жер бөлүп берүүлөр жана сатууларга шектүүлөрдүн бири деген кеп тараган.
 
Ал эми биздин 5-көз карандысыз эксперт «Колизей» ЖЧКнын директору Таалай Мурзакулов. Таалай мырза да жогорудагылардан кем калбай 7-апрелден кийин КР архитектура жана курулуш агенттигинин директорлугуна аябай аракет кылган. «Жыгылсаң төөдөн жыгыл» дегенби, айтор,  байкебиздин чоң кызматка болгон аракети оңунан чыкпай отуруп калган.
 
Демек, биз берген маалыматка ылайык, жогорудагы айтылган текшерүүчүлөрдү көз карандысыз эксперт деп атоого мүмкүнбү деген суроо туулат. Бул эксперттер эгер, көзүн жумса «кресло» көрүнсө кандай чечим чыгарса болоорун өзүңүз чечиңиз, урматтуу окурман.
 
Бердибек Суранчиев,
"Жаңы Ордо"
Подробности
Категория: Алдын ала талдоолор
Просмотров: 2050

Өткөндө өкмөт башчы Ө.Бабанов баштаган министрлер парламентте өткөн жыл менен акыркы үч айдын аралыгындагы ишинен да шоусу көп болгон “100 күн” программасын “катыра бажардык”,- деп отчет беришкен болчу. Алардын бул отчетун депутаттар  көпчүлүк добуш менен кабыл алып, “канааттандырарлык” деп баа беришкен. Адатта элдин көзүнчө аткаруу бийлигин сындамыш болуп, бирок жең ичинен өкмөт мүчөлөрү менен  баш сүзүштүрө салаңдаган май  курсактарын тийгизе кучакташкан кошоматчы депутаттар өкмөттүн кайсыл кыйраткан ишине ушундай баа беришкендиги түшүнүксүз.
 
Же кышы менен карапайым элдин уулуу көмүргө ууланып, караңгыда карайлап үшүп-шишип чыкканы, бар байлыгыбыз болгон мал жандыктардын жутка кабылып кырылгандыгы үчүнбү? Кыргызстандын экономикасынын жарымын түзгөн “Кумтөрдөгү” өндүрүш көлөмү ушул өкмөттүн тушунда эки эсе төмөндөп кеткендигине ким күнөөлүү?
 
Анткен менен депутаттардын ошол өкмөттү колдоп көтөргөн колу жерге түшө электе, башбакан Ө.Бабанов трибунада  мактана сүйлөгөн шилекейи аарчылбай жатып КМШ өлкөлөрү боюнча статистикалык комитети Кыргызстандын өнөр жай тармагындагы өсүш кескин басаңдап кеткендигин кабарлады. Ал тургай өткөн жумада президентибиз А.Атамбаев Астанага расмий иш сапар менен барганда да казак президенти Н.Назарбаев Кыргызстан келерки жылы Бирдиктүү экономикалык мейкиндикке киргенче өндүрүшүн, өнөр жайын кагаз жүзүндө эмес, чындап көтөрүшү керектигин айтты. Ансыз бүтүндөй мурдагы СССР аймагы бир мамлекет сыяктуу соода-сатык мамилесине өткөндө биз жалаң гана сатып алып, эч нерсе өндүрбөй сызга отуруп калышыбыз мүмкүн.
 
2012-жылдын биринчи кварталында өнөр жай продукциясын өндүрүү Кыргызстанда былтыркы жылга караганда 27,7 пайызга төмөндөп кеткен. Бул жалпы КМШ боюнча эң төмөнкү көрсөткүч болуп саналат. Салыштыруу үчүн ала турган болсок, Молдовада өнөр жайдагы өсүш 2,5 пайызга, Азербайжанда 0,3 пайызга гана төмөндөгөн. Ал эми калган КМШ өлкөлөрүндө өсүш белгиленди. Алсак, Арменияда 16,4 пайыз, Тажикстанда 14,6 пайыз, Беларуста 8,3 пайыз өсүш болду.
 
Жалпысынан биринчи кварталда КМШда өнөр жай тармагындагы өсүш 3,6 пайызды түзүптүр.
 
Мына, боордош, кошуна мамлекеттер “100 күн” деп шоу-кылып отурбай эле баш көтөрбөй иштеп, экономикасын өнүктүрүп, элинин жашоо-шартын оңдоп жатыптыр. Ал эми бизде жалаң гана ооз менен орок ормой, оромпой тепмей, кыйраткан иши бюджеттик мекемелерди кыскартып, жумушсуздардын санын көбөйтүү жана Грузияга ат тезегин кургатпай каттап, “тажрыйба алмашуу”. Тилекке каршы грузин дарагы Кыргызстандын кыртышына өспөгөндөй эле, алардын реформасы илдеттүү кой семирбегендей эле, эмнегедир жукпай жатат. Аның үчүн бизге Мимикодой (президент М.Саакашвили) тууганчылык, жердешчилик, бөлүнүп-жарылуучулук саясатын жүргүзбөгөн президент, грузиндердей духу жогору эл болушубуз  керек. Мына сага грузиндердин бактысынын жана кыкеңдердин трагедиясынын сыры...
 
"Майдан.kg" гезити, №13, 16-май
Подробности
Категория: Алдын ала талдоолор
Просмотров: 2073

Акыркы кездерде бир топ гезиттердин дүңүнөн сатылып алынып, жок кылынып жатканы тууралуу кабарлар айтылды. Айрыкча,“Майдан.kg” гезитинин бийликти безге сайган, алдым-жуттумдар менен жеп-ичкичтердин, шылуундар менен шумпайлардын эки жүздүүлүгүн ашкерелеген акыркы сандары окурмандарга жетпей жатышы биздин, окурмандардын тынчын алууда. Бул арамзалык иш кимдин колунан келип жаткандыгын айтпай эле коёлу. Аны гезиттараптан сандан-санга сындалгандар жасагандыгы бештен белгилүү.
 
Бирок, бир гана айтып коёрубуз, өткөн бийликтер да (Акаев, Бакиев) оппозициялык гезиттерди ушинтип дүңүнөн сатып алып өрттөп, журналисттерди коркутуп-үркүтүп жүрүп акыры өздөрү эл тарабынан кулатылып, тууган-уругу, катындары менен бала-чакасы кошулуп азыр чет жакта азып-тозуп жүрүшөт.
 
Бирок, биз, окурмандар “Майдан.kg” гезити эч качан элге чындыкты чагылдырган, алдым-жуттумдар менен эки жүздүү бийлик башындагылардын жасаган ишин сындаган багытынан кайтпастыгына ишенебиз. Ансыз деле азыр бийликти сындаган эки-үч эле гезит калды. Себеби мурдагы  Атамбаев менен Бабановду ачык колдогон же кыйыр түрдө жан тарткан басылмалардын көпчүлүгү көрүнөө да, көмүскө да алар бийликке келген соң бир беткей мактоого өтүшүп, чыркыраган чындыкты айтуудан “уялып” калышты. Эми ошолордун акырынан жем жеп, каржыланып жаткан соң аларды да түшүнөбүз.
 
Тилекке каршы эки ирет революция болуп, 90дон ашык эр азаматыбыздын өмүрү кыйылган менен эле өлкөбүздө адилеттик орноп, бийликтегилер таза иштеп калды деп айтууга болбойт. Ак үй, Көк үйдө баягы эле карапайым элдин канын митедей соргон, май баскан жүзүн, салаңдаган курсагын көрсөң кыжырың келген, байлыгы менен мансабына манчыркагандар отурушат. Ал эми “коррупцияга каршы күрөш”, “100 күн” деген ураандар жөн эле ураан, элдин башын айлантуу. Алар ушундай эле таза, адилет иштеп, коррупцияны жоюп жаткандыгы чын болсо, анда Баткен облусу аркылуу Тажикстанга аткезчилик жол менен ташылып жаткан күйүүчү майлар эмнеге токтой элек? Эмнеге түштүктө эл эгинди эшек менен эгип жатат? Бишкекте жол кире кымбаттап, электр энергиясына алдын ала төлөм (уюлдук телефонго бирдик жүктөгөндөй) киргизилип жатат? Эмнеге эки жылдан бери чет мамлекеттен бир да трактор келген жок? Уулуу көмүрдү ташып келип, элди ууландыргандар белгилүү болсо да, аларга карата кылмыш иши козголгон менен  эмнеге жоопко тартылбайт? Кышында төрт түлүк малыбызды жут каптап кырылып калгандыгына ким күнөөлүү? Эмне үчүн акыркы жылдары улуттар аралык гана эмес, аймактык, уруулук бөлүнүп-жарылуу, жердешчилик күчөп кетти? Эмне үчүн президенттик жана парламенттик шайлоодо сыртта жүргөн бир миллионго жакын мигранттар катышкан жок? Себеби алыста жүрүп, ушул бийликтин айынан азап-тозокту тартып жүргөн жаштарыбыз буларга добуш бербешин билип, БШК аркылуу атайын бут тосулду. Июнь окуясынын күнөөкөрлөрү, банкты тоногондор качан ачыкка чыгат? Айта берсе мындай мисалдар толтура. Керек болсо бул көрүнүш Акаев, Бакиев доорунда да болгон эмес. “Майдан.kg” гезитинин жогору жактан канчалык бут тосуу болбосун, ушул суроолордун жообун табууга аракет кылып, элге чындыкты айтуудан кайра тартпай тургандыгына ишенебиз.
Бийликтегилер өлкөбүздүн тышкы саясатын да тескери багытка буруп, кошуналар менен эзелки өнөктөштөрүбүздүн каарына калды.
 
Эгер депутат Ж.Жолдошева айткан немистердин божомолу чын чыкса, анда жакын арада Кыргызстанда чындап эле социалдык жарылуу болуп, ошондо көргүлүктү көрөбүз. Биз качан гана биригип, чындык үчүн талыкпай күрөшкөнүбүздө адилеттик орноп, турмушубуз оңолот. Биз эки жүздүү бийлик менен алдым-жуттумдардын элге каршы, популисттик ишин колдой албайбыз жана алардан коркпойбуз. Ал эми чындыкты өрттөгөндөр бир күн өздөрү да эл алдында жазаланат.
 
Аскар Туратбеков,
Нарын облусу
 Булак: “Майдан.kg”
Подробности
Категория: Алдын ала талдоолор
Просмотров: 1707

Бишкек,  “Саясат.kg”. Кечээ “Ата-Журт”, “Бүтүн Кыргызстан” жана Кыргызстан коммунисттер саясый партиялары биргелешкен билдирүү таркатып, бийликтин бүгүнкү өңүнө таамай аныктама беришти: өз элинин кыйынчылыктагы турмушун көрбөгөн сокур, карапайым адамдын арыз-арманын укпаган дүлөй, өз элин экиге бөлгөн чагымчыл, парламенттик демократияга жамынган диктатор.
 
Ошто, Баткенде жана Жалал-Абадда миңдеген адамдар Өкмөттүн токтоосуз отставкасын, Башмыйзамды өзгөртүү боюнча Конституциялык жыйын чакырууну, 2010-жылкы каргашалуу апрель-июнь окуяларына күнөөкөрлөрдү жана Бишкектеги банк уячаларынан акча тоногондорду жазалоону талап кылышканы менен, бийлик бир да жолу көз ирмеп койгонго жарабады.
 
“Президент менен Өкмөт жүз миңдеген калктын мыйзамдуу талабын уккан жок. Тескерисинче алар аймактык ажырымга жол ачып, калкты аймактык ажырымга алып келүүдө. Жакында бийлик оппозиция лидерлеринин атын сатып, Таласта тынчтык митингинин катышуучуларына каршы чагымчыл аракеттерди уюштурду. Мындай ыплас иштердин артында Өкмөт башчы Ө.Бабановдун жана жергиликтүү бийлик төбөлдөрүнүн карааны калдайып көрүнүп турат. Биз элди экиге бөлгөн бийликтин бул арам аракетин кескин түрдө айыптайбыз”,- дейт оппозиция.
 
Оппозициянын айтымында, өкмөт акыркы эки жылда өлкөнү өнүктүрүү боюнча натыйжалуу иш жүргүзүүнүн ордуна басма сөздө өзүн-өзү рекламалоо менен алек. Натыйжада калк менен бийликтин ортосундагы ажырым күндөн-күнгө терендөөдө.
 
Арийне, ансыз деле чыдамы түгөнүп бараткан калктын көңүлүн калыбына келтирүүгө өкмөттө шанс бар болчу. Анүчүн бийлик Коомдук каналдын түз эфирине келип, оппозиция менен эл талабын талкуулашы керек болчу. Бирок, өкмөт оппозициянын чакыруусун кабыл албай, анын ордуна мамлекеттик резиденцияга журналисттерди топтоп, шоу уюштуруу менен тим болду. Ал аз келгенсип, 100 күндүк программасын мыкты аткаргандыгын уламдан-улам кол бала телеканалдары аркылуу айттырууда. Кыштын, жаратылыштын туткунунда калып, кыйынчылыкты жон териси менен сезген карапайым калк муну шылдыңдоо катары баалашууда. Андан көрө, адам өлүмдөрү, жутчулук, электр энергиясынын үзгүлтүккө учурап тургандыгы, ууланган көмүрдү мектептерге чейин таркатып олтуруп алгандыгы үчүн элден кечирим сураса жарашмак. Ошондо балким, коомдук чыңалуу азыркыдай апогейине жетмек эмес.
 
Албетте, бийлик өз элинин талабын аткарган жок. Бул шартта оппозиция эмне кылмак? Буга чейин эле митингдерде эл оппозициядан чечкиндүү кадамдарды талап кылган. Өз элинин кургур заманга кептелбегенин сезбеген дөңгөчтөй болгон бийликти селдей жууп кетүү керектигин айткандар да болгон. 21-апрелде элдин бийликке берген убактысы түгөндү. Ошол замат оппозиция саясый стабилдүүлүк үчүн жоопкер эмес экендигин, эгерде калктын каары кайнап, өлкөдө баш-аламандыктар менен төңкөрүш болуп кетсе бардык жоопкерчилик президент, Жогорку Кеңеш жана өкмөткө жүктөлөрүн эскертти.
 
Себеп дегенде, элибиздин чыдамы түгөнгөндө, аны эч ким токтото албайт. Буга эки жолку элдик ыңкылап далил. Азыр да, оппозициянын эл менен бийликтин ортосундагы ортомчулук миссиясы бүттү. Сөз, аракет – элдин өзүндө!
Подробности
Категория: Алдын ала талдоолор
Просмотров: 1984

Бишкек,  “Саясат.kg”. Ош, Баткен, андан кийин Жалал-Абад шаарында жалпысынан жүз миңдеген адамдар катышкан митингдерде бийликке бир катар орчундуу талаптардын коюлгандыгы белгилүү. Талаптардын эң негизгилери: өкмөт башчысы Ө.Бабановдун отставкасы, “Эл ишениминдеги” өкмөттү түзүү, конституциялык жыйын чакыруу, 2010-жылдын апрель жана июнь айларындагы кандуу окуялардын чыныгы күнөөкөрлөрүн жазалоо жана “АзияУниверсалБанктын” кутучаларынан уурдалган миллиондор үчүн күнөөкөрлөрдү табуу. Бийликке акыркы мөөнөт катары – 21-апрелге чейин убакыт берилген. Андан соң, эгерде бийлик бул талаптарды аткарбаса, президенттин отставкасын талап кылган митингдер бүт өлкө аймагында болуп өтөрү айтылган.
Бийлик эл талабын уккан жок. Сокур, дүлөй, жансыз болуп бүткөнүн толугу менен далилдеди.
 
Жада калса, оппозициянын түз эфирде эл талабын чогуу талкуулоо чакырыгын да кабыл алышпай, Бабанов баш болушуп, резиденцияга жолугуштуу уюштурумуш болушту да, анын шылтоосу менен өздөрүнө чоң пиар жасашты. Бүт маалымат каражаттары колдо тургандыктан, оппозицияны бырчылдата жамандамайы ансыз деле ширеңке жаксаң дүрт эте түшчү абалды чыңалтууда.
 
Өкмөттүн 100 күндүк программасынын аткарылышы элди, эксперттерди канаатандырган жок. Себеби, анда негизинен декларативдүү гана максаттар жазылып, көбүнчөкагаз жумуштарын аткарууга басым жасалган.
 
Учурда бийлик эл тагдырын түз олтуруп чечкендин ордуна, өтө кооптуу – антимитингдерди баштоого кам урганы белгилүү болууда. Таласта түштүктүктөр митинг өткөзөт шылтоосу менен элди экиге бөлгөн бийлик, бул картаны бардык жерде колдонууга белсенүүдө. Өз элин ушинтип экиге бөлгөн бийликтен деги эмне жакшылык күтсөк болот?
 
Акаев, Бакиев баскан жолду арбытып жаткан бийликтен ошон үчүн журтубуздун көңүлү көчкөн журттай калды. Акыркы арга – президенттин отставкасы болчудай. Оппозиция өз планын жарыялай элек. Бирок, алар да жүз миңдеген элдин талабын аткаруу үчүн күрөшүүгө турууга милдеткер.
Подробности
Категория: Алдын ала талдоолор
Просмотров: 2267

Бишкек, “Саясат.kg”. Кыргызстанды сактоо кыймылынын координатору Аширбек Болотов менен маек
 
- Оппозициялык күчтөрдүн митингдерге чыгып, бийликтин, өкмөттүн аракеттерине нааразылыгынын төркүнү эмнеде?
 
- Мунун келип чыгышынын себеби кечээ жакында көлдө болуп өткөн, Оштогу, Жалал-Абаддагы же Таластагы эле митингдер эмес, убактылуу өкмөттүн бийликти басып алган учуруна барып такалат. Балык башынан сасып жатат. Атамбаев, Текебаев, Сариев, Бекназаров баштаган төртөө 2010-жылдын 7-8-апрелдин түнүндө банк кутучаларын ачышып, мародёрлук кылышкан. Супер-маркеттерди, соода түйүндөрүн айтпай эле коёюн, үч банктан: “Азияуниверсал”, “Бакай”, “Манас” банктарынан 350 миллион доллар накталай акча алышкан. Бул документалдуу түрдө тастыкталганын биз эбактан бери эле айтып келатабыз. Жогоруда ысымдары аталган сепаратисттер уурдалган акчаларын сиңирүү үчүн, өзгөртүүлөр киргизилген конституцияны өткөрүп кетүү үчүн түштүктөгү кыргынды Кадыржан Батыров менен чогуу сүйлөшүп алып, өздөрү уюштурушкан. Бул сөздү мен бийликти көрө албаган киши же оппозиционер катары айтып жаткан жокмун. 2011-жылдын 9-июнундагы Жогорку Кеңештин “убактылуу өкмөт түштүктөгү кыргынды уюштурганга күнөөлүү, банк кутучуларындагы акчаларды алышкан. Буга башкы прокуратура иш козгосун” деген токтому бар. Булардын оюнда эки улутту кайраштырып коюп, өздөрү карап турушмак. Ош окуясынын астында гуманитардык жардам кылып, Текебаев, Батыровтор элге ун таратканда бирөөнө тийген ундун кабынан Калашников автоматы чыккандыгы боюнча маалымат бизде бар. Атамбаев: “Смерть пяти-шести идиотов ничего не значит” деп Кадыржан Батыров менен сүйлөшкөндө Кадыржан Батыров: “бизге үч күн тийбей тургула, кыргыздын акесин окутабыз, үч күндө кыргызды момурайтып коёбуз” деп жатат. Үч күн кайтарышты, канчалык куралданса да, акыры кудай бар экен, элибиз аман калды. Убактылуу өкмөттүн андан берки уурулуктары да жетиштүү. Роза Отунбаева өзү: “Бюджеттин 26 миллиард сому чачылып жок болуп кетти” деп айтып алган. 100 миллиондук гуманитардык жардамдардын дайыны табылбай калды. Ушундан кийин түндүк-түштүк маселесин козгоп, элди алаксытып жатышат. 2009-жылы эсептеп көрсөк, 15 миң жолу митинг болуптур, ал убакта дал ушулар оппозицияда болчу. Бүгүнкү күндө Ошто көп болсо, эки-үч митинг өтөт, аларга каршы дүжүрлөрдүн баарын чыгарып алып, “ушулардыкы өттү. Булардын баарын оштуктар кылып жатат” деп жатышат. Бийликтегилер эми кыргызды кыргыз менен кырылыштыргысы келип жатат. Жакында көлдө да митинг болуп өттү. Кумтөргө эч кимди киргизбейт, канча алтын казылып жатат, эмне болуп жатат? Радиоактивдүү калдыктарды көмүп жатат, аны эч кимге текшертпейт. Чоо-жайын билгиси келген эл жооп сураса, ичкилик ичкендердин бир ууч тобун алып келип, элди сабатып таратты. Таласта да жергиликтүү эл экономикалык маселелерди көтөрүп чыккан. Аны алдын ала эле “Ташиев менен Мадумаров келет экен” деп ушак таратышып, чагым салышты. Ушул жактан 300дөн ашык милиция кызматкерлери барды, “Ата-Мекен” партиясы, Бабановтун иниси, Койсун Курманалиеванын агасы элге акча таратышып, митинг боло электе эле элди дүрбөтүп койду. “Ата-Журттун” буга эч кандай тийешеси жок. Булар бул жүрүшү менен көп алыска барбайт. Мен өзүм чүйлүкмүн, карапайым элдин бири-бири менен талаша турган эч нерсеси жок.
 
- Сөзүңүзгө аралжы, түштүк менен түндүктүн айылдарынан келгендер Чүйдү, Бишкекти ээлеп алды деп нааразы болгондор бар. Ошол эле Чүйдүн аттуу-баштуу адамы - Темир Сариев “сарттар келип басып атат” дегенин туура көрөсүзбү?
 
- Сариев менен көрүстөнүбүз бир, менин тууганым. Мен өлсөм, мага келип топурак салышы керек. Бирок, Сариев шүмшүктүн айтканын эч ким туура көрбөйт. Оштуктардын, нарындыктардын, таластыктардын Бишкектин тегерегине келгенине 20 жылдан ашып калды. Ал учурда “быссымылда” дегенде эле немис көчүп баштады, анан грек кетти, анан кийин түрктөрдүн мыктылары көчүп, кырк пайыз үйлөр бош калды. Ал үйлөрдү кыргыз ээлебегенде ким ээлейт эле, ошол эле түрктөр, күрддөр, кытайлар басмак. Ички мигранттар Кара-Балтада, Сокулукта, Кара-Балтада, Кантта көп. Эки аймактан агылып келгендердин балдары ушул күнгө чейин мушташа да элек. Чогуу чоңоюп, чогуу өсүп, карапайым эл бири-бири менен эриш-аркак эле жашап келе жатат. Бийликтеги эл бузарлар гана жеп-ичкенин жашырыш үчүн түндүк-түштүк маселесин козгоп, элди кырды-бычак кылып, саясатташтырып ийип жатат.
 
- Кыргызстандын учурдагы саясий акыбалына кандай баа бересиз? Мындан ары эмнени күтүүгө болот?
 
- Азыр өтө кыйын акыбалдабыз. Ууланган көмүрдүн таасирин эле алалы. Анын кедергиси жеке эле Бишкекке эмес, бүтүндөй Кыргызстандын аймагына тийип жатат. Атамбаев буга Бабанов кол койгонун айтса, ал “менин колум коюлган эмес” деп күнөөнү мойнуна албай, бири-бирине шылтап коюшту. “Казак” деген улут жок болчу” деп Атамбаев оозуна келгенди сүйлөп койду эле, казактар 2011-жылдын 3-августунда “70 миң тонна Куландан көмүр алынсын” деп Атамбаев кол койгон чечим бар экендигин айтты. Эми силердин “азык-түлүгүңөр радиоактивдүү” деп сырттагы мамлекеттердин эч бири сатып албай, чек арадан чыгарылбай, баары төгүлүп жатат. Ошол эле радиоактивдүүлүктүн айынан Кыргызстанда тигилип, экспорттолгон кийимдер чет жакта сатылбай баштады. Бир эле ал эмес радиоактивдүү көмүрдүн кесепетинен кыргыз элинин генофонду бузулуп, тубаса майып балдар төрөлө тургандыгы турулуу эле иш. Буга Атамбаев жооп бере алабы? Буга ким жооп берет?
 
- Кыргызстан мындай акыбалдан кантип чыгып кете алат деп ойлойсуз?
 
- Элди ойнотуп келаткан бийликте жети эле адам бар: Роза Отунбаева, Алмазбек Атамбаев, Өмүрбек Текебаевти, Темир Сариев, Топчубек Тургуналиевти, Өмүрбек Бабановту мыйзамды карап олтурбай эле элдин ортосуна салып, таш бараңга алыш керек. Болбосо булар кайра эле элдин башын айлантып, түндүк-түштүк маселесин күчөтүп, эки аймактын элин кырылыштырганга барат. Мен буларга 2008-жылы эле: “Бул ичип жатат, а силер, шакалдар бийликке келсеңер ичпей туруп талкалайсыңар” деп айткам. Бакиевке убагында эч ким баш бербей калган. Атамбаев премьер-министр кезинде ундун баасы бир жарым миң сомго көтөрүлгөн. Эми ал президент болуп туруп да, мамлекетти жыргата албайт. Каалайбызбы, каалабайбызбы, сөзсүз түрдө революция болот, анткени, бийликтегилер элди ушуга түртүп жатат. Элдин алдында күнөөлүүлөр сөзсүз өз жазасын алып, жооп бериши керек.
-                      
 
Подробности
Категория: Алдын ала талдоолор
Просмотров: 1671

Бишкек,  “Саясат.kg”. “Ата-Журт” фракциясынын лидери Камчыбек Ташиев премьер-министр Өмүрбек Бабановго 13-апрелде, саат 20.00дө Коомдук каналдын түз эфиринде жолугушууну сунуштаган. Өкмөт башчысы оппозицияны теледебатка чакыргандан кийин, Ташиев Коомдук каналдын баш директору Кубат Оторбаевге чалып, өкмөттөн ошондой жолугушууну уюштуруу суранычы келип түштүбү-жокпу, сураштырган. Андай сунуш Оторбаевге келип түшкөн эмес. Өкмөттөн теледебат качан боло турганын билүү максатында чалганда да, Кубат Оторбаевге андай жолугушуу уюштуруу тууралуу ойлору жок экенин айтышкан.
 
“Ушунун өзүнөн эле премьер-министрдин элдин башын айлантып жатканы көрүнүп турбайбы. Андан тышкары, Бабанов менен анын аппаратынын башчысы Төрөгул Беков оппозицияга меморандум бергенин жар салды. Биз эч кандай расмий документти көргөн жокпуз. Качанга чейин элдин башын айлантышат? Элдин баарын келесоо ойлошобу? Айткан бир да сөзүндө турушпайт. Расмий жолугуштук деп айтышат, кайра ачык жолугушуу уюштуралы дешет. Бирок, анын бирин аткарыштыбы? Бабановдун оппозициянын өкүлдөрү менен кокусунан жолугушуусунан өз абийирин көтөргүсү келгени билинип эле турат”,- дейт Камчыбек Ташиев.
 
Бирок, Бабанов түз эфирге келбей койгону маалым. Анын ордуна, басма сөз катчысы аркылуу 18-апрелде 5тен өкүлдөн турган топтордун жолугушуусуна чакыруу жөнөткөн.
 
Дал ушундай жашыруун жолугушууга карата оппозициянын позициясын өкмөт билбейт дейсизби? Ошол эле күнү “Адилет Келечек” оппозициялык кыймылы билдирүү таркатып, жабык эшик артындагы сүйлөшүүлөргө барышпай тургандыгын жар салбады беле. “Ар бир тараптан бештен өкүл катыша турган бул жыйынды уюштуруунун эч кандай зарылчылыгы жок. Себеби жакында Ошто, Баткенде жана Жалал-Абадда өткөн ири митингдин катышуучулары Кыргыз Республикасынын Өкмөтүнүн токтоосуз отставкасын жана «Эл ишениминдеги профессионалдуу Өкмөт» түзүүнү талап кылышкан. Ошондой эле калк апрель-июнь каргашаларына күнөөлүүлөрдү аныктоону жана конституциялык жыйын чакырууну мамлекеттик бийликтен талап кылышкан эле. Ушундан улам премьер-министр Ө.Бабанов эптеп убакыт утуу максатында оппозиция лидерлерин жабык эшик артындагы сүйлөшүүгө чакырбай, он миңдеген калктын талабын эске алып, токтоосуз отставкага кеткени оң. Өлкөдөгү бардык маселелер элден жашырылбай, ачык-айрым, түз эфир аркылуу талкууланышы керек”,- делет билдирүүдө.
 
Оппозициянын айтканында кынтык жок. Сокурга деле Бабановдун саясий соода баштап, өзүн, өзү жетектеген өкмөттү сактап калууга аракет жасап жатканы көрүнүп турбайбы. Акаев, Бакиев деле ушундай ыкманы колдонушкан. Оппоненттерин кызмат менен сатып алуу ыкмасына учурунда Бабанов да түшкөн. Билсеңиз керек, 2007-жылы Бабанов да Бакиевге каршы митингдерге катышып, мотор болгон. Көп өтпөй, анын Максим менен сүйлөшкөндөн кийин (ал жолугушуу тууралуу маркум Мелис Эшимканов тирүү кезинде ачык эле айтып жүргөн), 1-вице-премьер-министр болуп чыга келгени белгилүү. Азыркы оппозиция өкүлдөрүн да Бабанов демек, өзүнө окшош, туруктуу позициясы жок саясатчылардын катарында элестетет окшойт.
 
21-апрелде элдин кезектеги бийликке берген мөөнөтү бүтөт. Бир да эл талабы аткарылган жок, кайра тескерисинче, баарыбыздын башыбызды айланткысы бар булардын. Кеп эл үмүтүн оппозиция актайбы, же соодалашып кетеби – ошондо. Анткен менен, оппозиция “бизге кызмат керек эмес, биз элдин жыргалчылыгы үчүн башынан аягына чейин турабыз”,- дебеди беле.
Подробности
Категория: Алдын ала талдоолор
Просмотров: 2536

Бишкек, ИА “Саясат.kg”. Эртең Жалал-Абад шаарында кыргыз оппозициясынын кезектеги митинги болуп өтөт. Буга чейин ушундай эле иш-чаралар Ош жана Баткен шаарларында болуп өтүп, көп сандаган адамдардын катышуусунда бийликке бир катар талаптар коюлган.
 
Эртеңки митингге “Ата-Журт” фракция лидери Камчыбек Ташиев расмий түрдө КР президенти А.Атамбаевди, өкмөт башчысы Ө.Бабановду жана парламент спикери А.Жээнбековду чакырган. Себеп дегенде, элдин негизги талаптары дал ушул жетекчилерге карай багытталгандыктан, өздөрү келип, эл талабын угушу кажет. Ансыз деле бийлик дүлөй, сокур, кырдаалды жонтериси менен сезбеген дөңгөч болуп турганда, оппозиция кол сунуп, эл менен бийликтин ортосундагы ортомчулук милдетти өзүнө алып олтурат.
 
Мунун дагы бир себеби – оппозициянын Баткендеги митингинде катуу сөз болуп, эл бийликке каршы чечкиндүү аракеттерди талап кылган. 7-апрелге чейин талаптарды аткарууга бийликке убакыт чектелген. “Болбосо, биз президенттин отставкасын талап кыла баштайбыз”,- деген оппозициянын эл алдында берген убадасы бар.
 
7-апрелге чейинки мөөнөт да бүттү. Буга чейин Ош митингинин талаптарына бийлик канчалык дүлөй, сокур болуп келсе, Баткендеги миңдеген элдин талабына да “түкүрдүм” дегендей мамиле жасады. Анын ордуна, Ташиев айткандай, бийлик өзүн-өзү 7-апрелдин шылтоосу менен болушунча рекламалап алууга үлгүрдү. Бул көрүнүш башкасы бул жакта турсун, ошол апрель баатырларынын да кыжырдануусун жаратты. Себеби – 2 жыл өтсө да, элдин талабы аткарылбай, революция өз максатына жеткен жок. Митингдерде деле ошол талаптар коюлбады беле. Маселен, эмнеге эмгиче апрель жана июнь окуяларынын күнөөкөрлөрү жазасын алган жок? Эмне ушунча убакыт бийлик текей терип жүрдүбү? Айтор, айта берсең арман көп. А бирок, элдин арыз-муңу менен бийликтин эсептешпей калганы качан. Капкачан көздөрүн май басып калганын кайда жашырабыз?
 
Учурунда, эл талабын укпай койгондон Акаев менен Бакиев өз өлкөсүнөн качып кетүүгө аргасыз болгон. Бул бийлик да ошол даңгыр жол менен бара жатат. Кеч боло электе оппозициянын сунушуна макул болуп, Жалал-Абадка аттанып, эл талабын угушканы кажет. Болбосо, кеч болуп калышы мүмкүн.
Подробности
Категория: Алдын ала талдоолор
Просмотров: 2227

 

Бишкек, “Саясат.kg”. Өткөн жолку Оштогу митингде оппозиция өкмөттүн отставкасын талап кылып, 15-мартка чейин талап аткарылбаса, өлкө боюнча нааразылык акцияларын баштай тургандыгын жарыялаган.
 
Анда коюлган алты талаптын ичинде, Конституциялык реформа, эл ишениминдеги Өкмөттү түзүү, ошондой эле 2010-жылдын апрель жана июнь каргашалуу окуяларынын күнөөлүүлөрүн жазага тартуу жана алдыдагы жергиликтүү шайлоолордү таза, адилет өткөрүү бар. Эгерде бийлик бул коюлган талаптарды аткарбаса, өз элинин сөзүн укпаса, анда өлкөдө нааразычылык акциялары уланаары айтылган.
 
15-март эмес, 28-март да келди, Баткендеги оппозициянын үлкөн митингине үч күн калды, бийлик тараптан сүйлөшүүгө чакыруу же расмий түшүндүрмө берүү аракеттери массалык маалымат каражаттарында байкалган жок. Анысы аз келгенсип, жергиликтүү шайлоо боюнча али да соттошуулар болууда.
 
Өткөн кыш узун болгондуктан, калкыбыз чоң кыйынчылыктарга туш келди, алыскы райондордо тоют жетишсиздигинен кара мал жутка кулады. Эми жаздын кечигүүсүнөн улам мөмө – жемиш, жана эгин – чөп өз убагында бышып жетилеби, эл күзгө чейин азык - заттарды тиешелүү деңгээлде камдай алабы? Мамлекеттин азык – зат коопсуздугун деле ойлогон жан барбы? Мына ушундай орчундуу маселелерди же Өкмөт, же парламенттеги көпчүлүктүн коалициясы чечүүгө кудурети жетеби?
 
Чынында эле кырдаал оппозициянын куйгөнүнчө бар чыгаар. Сыягы ийри отуруп, түз чечип, мамлекеттин келечегин жана эл турмушун ойлоого убакыт жетип келген чамасы. Бирок, ушул маселелерди туура баалап, бийлик элди угабы? Оппозиция менен бир жеңден кол, бир жакадан баш чыгарып иш жүргүзө алабы, маселе мына ушунда...
 

 

Подробности
Категория: Алдын ала талдоолор
Просмотров: 2530

Мейли уюм, кыймыл же партия болсун, адеп сөзсүз түрдө өзүнүн жобосун иштеп чыгат. Андан аркы аракетинде дал ушул алкакты негиз кылып алууга тийиш. Чындыкта уюмдар уставында эмне жөнүндө жазылгандыгы тууралуу унутуп калгандай сезилет.  Бийликтин партиялары жоболорунда көрсөтүлгөн коомдук багыттары боюнча иш алып барып жатабы? Албетте, бул суроого көңүл бурбаса да болот. Бирок, учур көңүл бурууну талап кылып жаткандай. Төмөндө ушул тууралуу азыноолак сөз кылсак.
 
Президент А.Атамбаевге кош канат бүтүргөн Кыргызстан социал-демократиялык партиясы учурда мүмкүнчүлүгүнүн жетишинче өлкөнүн кош тизгинин өз колуна кармап, Кыргызстанды кайдадыр жетегине алып жаткансыйт. Калкты түйшөлткөн жери кайда барабыз? КСДПчылар партиясынын аты айтып тургандай, коомдук багыты социал-демократияны куруу. Мурдагы СССРдин курамына кирген мамлекеттерде “социал” деген сөз кадимки бейпилчиликти, арзанчылыкты элестеткен өзүнчө доор болуп биздин элесибизде түбөлүккө калды. “Социал” деген сөз жашоо-шарттын деңгээлин аныктоочу термин катары колдонулса да, биз аны теңчилик жашоо-шартынын мыкты үлгүсү деп айтып жүрөбүз. КСДП партиясынын иш-аракеттери Уставында жазылган багыттарга коошпой жатканы коомго белгилүү эле болуп турат. Либерал экономиканы (ээн-эркин баш аламан өнүгүү, мамлекеттин көзөмөлү жок, күчтүүсү алсызын талкалаган) мындайча айтканда, капиталисттик ири монополисттерди жаратуучу коомду өнүктүрүп жатканын көрүп турабыз. Коом ошол үчүн баш аламан. Адамдар да башкача болуп бара жатат. Демек, капитализмдин, ушул коомдун келечеги жок десек туура болгудай. Капитализм ааламдашуу учурундагы капкан экенин түшүнгөн саясатчылар күндөн күнгө элдин жашоосун оорлотуп, мамлекеттин коопсуздугуна болгон коркунучу чоңойуп жатат. Парламенттеги фракциялар мамлекеттин башкы мүлктөрүн эч кандай эске албай, мисалы, жерди биз канткенде туура пайдалана алабыз, ири мамлекеттик мекеме, завод-фабрикалар, айыл чарбасы жөнүндө ойлонбой, өздөрүнүн бактысын өздөрү чектеп, мурдагы президенттердей кимди кайсыл жерге жумушка орноштуруп, бийликти бекемдесем деген жасалмалуулукту жаратып жатат.
 
“Республика” саясий партиясы - коомдогу аткаруу иштерин өздөрүнүн күч аракетине жараша жазып алышкан. Эч кандай социалдык жана коммунисттик деп айтпай, туура эле саясий партия деп айткандыгында кеп жатат. Демек, кандай гана партия болбосун максаты элдин жашоо-шартын оңдоо деп саналат. Виктор Гюго айткандай, “ар дайым коомдо чолок ойлорго кооз уйкаштар балдак катары кызмат кылышат”,- деген сыяктуу. Партиянын уставына дагы бир көңүл бурсак, өлкөнүн маданиятына жана тилине кам көрүү жөнүндө да айтылат. Келген жаңы өкмөттүн жана президенттин улуттук кыргыз тили жөнүндө эч кандай аракеттер болбой жатканын коом көрүп турат. Жакында Бишкектеги бир гимназиядагы окуучулардан “Кайсыл сабак силерге кызыксыз?”,- деп сурамжылоо жүргүзгөндө “кыргыз тили бизге эмне кереги бар, ал сабакты алып салгыла” деген окуучулардын сунушу эң көп түшкөн. Бул улут үчүн эң эле уят нерсе. Келечек тилден танып жатса, аларга ким кам көрүшү керек? Эмне үчүн “Республика” өз уставында жазылган орчундуу болуп турган улуттун башкы көйгөйүн колдобой жатат? Бул сыяктуу көйгөйлөр көп, аларды чын ниеттери менен оңдоону ойлобосо, анда алар өздөрүнүн жанынын жыргалчылыгы үчүн жашаган киши болуп, кыргыз тарыхында төмөн баа берилген саясатчыларынын катарында болуп кааларынан шек жок. Дагы убакыт бар, кантсе да адамды сүйлөгөн сөзүнөн, кыймыл-аракетинен кыргыздар бат эле билип коёт эмеспи. “Кишинин маңдайынан карап сөз узат”,- деп айтат. “Республика” партиясы социал-демократ дагы эмес, элдин саясий гана абалын курутуучу партия болуп калабы?
 
“Ата-Мекен” социалисттик партиясы аты айтып тургандай, социалисттик коомго жетелөөчү партиялардын алдыңкы сабында турат. Бул партиянын кылган иш-аракеттерине карап биз социалисттик жашоону элестете алабызбы? Же, Социалисттик “Ата-мекен” партия деген жазуу социалисттерди жөн гана куру сөз менен азгыруучу лозунгбу? Кооздук үчүн жазылып калганбы? Бул ойлор эмне үчүн айтылып жүрөт? Себеби, “Ата-Мекен” партиясы социалисттик жашоо үчүн балким, колунан келгенин жасап жаткандыр. Эмне үчүн бул партиянын ишеничтүү кишилери эсептелген Равшан Жээнбеков сыяктуулар коомдо жаштарды чогултуп, “биз либерал экономиканы түзөбүз”,- деп жар чакырып жүрүшөт. Өзүнүн тарыхында туруктуулугу менен эл оозунда алынып жүргөн партия үчүн бул чоң уят. Анткени, партиянын ичиндеги биримдик менен идеянын тактыгы жок болуп ишенимсиздикти жаратат. Же уставды өзгөртүп, КСДП, “Ата-Мекен” партиялары социалисттик жашоонун наамын булгабай, партиялардын уставына өзгөртүү киргизип, либерал экономика же капиталисттик деп өзгөртүп алса иштери мындан да жүрүшүп кетет беле.
 
Бул партиялар өз максаттарын так аткарбаса, Кыргызстанга ал партиялар чындыкты, улуттук-идеологиялык башкарууну, тилдин абалын, мамлекетин келечегин түзүп бере алаб?. Сын эч кимге жакпайт, бирок, сынды көтөрүп, аны жүрөк менен кабыл алып, өз катачылыгын сезүү, коомдук пикирлерге көңүл коюу - бул адамдагы эң бийик сапат болсо керек. Күчүнө ишенип, “Эмне мен жөнүндө жаман маалымат таратасың?”,- деп куугунтука алган Бакиевди да көрбөдүкпү.
 
Булак: "Майдан.kg" гезити
 
Подробности
Категория: Алдын ала талдоолор
Просмотров: 1871

 Оштогу митингде оппозиция өкмөттүн отставкасын талап кылып, 15-мартка чейин талап аткарылбаса, өлкө боюнча нааразылык акцияларын баштай тургандыгын жарыялады.
 
Митингде оппозиция ошондой эле 4-мартка белгиленген шаардык кеңешке шайлоодо Ош шаар мэри Мелис Мырзакматовдун "Улуттар биримдиги" партиясын колдоого чакырып, 1993-жылкы Баш мыйзамга кайтып баруу демилгесин да көтөрдү. 

"Ата-Журт", "Бүтүн Кыргызстан" жана "Улуттар биримдиги" партиялары биргелешип уюштурган митинг Ош шаарынын борбордук аянтында өттү. Байкоочулар акцияга чогулгандардын саны 15 миңге чукулдаганын айтса, уюштуруучулар аянтка 25 миңдей адам катышты деген ишенимде. 
 
​​Митингде сөз сүйлөгөн “Ата-Журт” партиясынын лидери Камчыбек Ташиев азыркы бийликтин тышкы саясатын айыптап, Орусия менен өнөктөштүк мамиле бузуп алуу коркунучунда экенин айтты. Ошондой эле ал учурда өлкөнүн башкы оорусу жердешчилик болуп аткандыгына токтолду:

- Акыркы жылдары мамлекетибизде регионалдык, жердешчиликке бөлгөндөр көбөйдү. Сен башка облустан, сен башка региондон деген сөздөр болуп атат. Бул туура эмес. Кыргызстандын бардык аймагы бирдейбиз. Биз бир бүтүнбүз, биз бирбиз. Себеби Ысык-Көл да менин жерим, Нарын да менин жерим, Ош, Жалал-Абад да менин жерим. Бардык жер кыргызстандыктардыкы.

Митингге адамдар Кыргызстандын булуң-бурчтарынан келгени айтылды. Ысык-Көл облусунан келген, Жогорку Кеңештин мурдагы депутаты Кубанычбек Кадыров учурда өлкөгө биримдик суудай зарыл болуп турганын билдирди:

- Кыргыз түндүк-түштүк болуп эч качан бөлүнгөн эмес, бөлүнбөйт дагы. Мен маселен ушул демилгени колдоп, атайын Ысык-Көлдөн келип отурам. Бийликте турган саясатчылар өздөрүнүн амбициясын күчөтүп, кызматында отуруп туруш үчүн ушундай бөлүп жаруучулукка барып жатат. Биз мындайга жол бербейбиз.
 
​​Өзбек тектүү тургун Набитжан Маратжанов митингдегилерди улуттар аралык маселеге этият мамиле жасоого чакырды:

- Учурда кыргызга да, өзбекке да тынчтык керек. Ушул жердегилерге да, бул жерге келбегендерге да, баарыбызга нандай зарыл болуп турган нерсе тынчтык. Кыргызстанда адамдарды улутуна карап бөлбөшүбүз керек, анкени биздин мекенибиз бир, жерибиз бир.

Ал эми "7-апрель баатырлары" коомунун жетекчиси Турусбек Сагынаевазыркы бийлик элге берген убадаларын аткарбай жатканын белгиледи:

- "Ырыстуу чочконун мурдунан бок кетпейт" болуп, баатырлар 7-апрелде булардын колуна бийликти салып берди эле. Бирок ошондон бери бизди кордоп келатканын көрүп келатасыздар. Же сот иши ишке ашпайт, же күнөөлүүлөр камалбайт. Апрель окуясы да, июнь окуясы да терең изилденип, айыптууларга жаза бериле элек.

Митингде 4-мартта өтө турган Ош шаардык кеңешине шайлоодо Мелис Мырзакматовго тиешелүү делген “Улуттар биримдиги” партиясын колдоого чакырган ураандар да айтылды.
 
​​"Бүтүн Кыргызстан" партиясынын лидери Адахан Мадумаров да шаар мэри Мелис Мырзакматовду кызмат ордунда кармап туруу учур талабы экенин белгилеп, элди ал жетектеген партияга добуш берүүгө үндөдү:

- Келе жаткан шайлоодо аткаминерлер да кийлигишип, анын жыйынтыгына таасир этип жатканын көрүп, биз келип отурабыз. Болду, эми жетишет. Биз баарын элдин эркине коюшубуз керек. Эл өзү билет, кимди шайлап кимди коюш керек экенин. Ошондуктан жыйынга Нарын, Талас, Жалал-Абад, Ысык-Көл, Баткен, Чүй жана Оштун өзүнөн келип, Мырзакматовду, «Улуттар биримдигин» колдойбуз деп турабыз.  

Мадумаров келе жаткан шайлоодо бурмалоолор орун алса, добуш берүү күнүнүн эртеси 5-мартта эл кайрадан митингге чыга турганын айтты.

Митинг соңунда алты пункттан турган кайрылуу кабыл алынды. Анда башкы нерсе катары “1993-жылкы Конституция кайра кайтарылсын” деген талап киргизилди. Бийлик мындагы талаптарды 15-мартка чейин аткарбаса, нааразылык акциялары өлкө аймагы боюнча башталаарын оппозиция жар салды:
 
​​- Оштогу "Тынчтык жана биримдик" митингинин катышуучулары бүгүнкү саясий-экономикалык жана социалдык оор абалды кескин өзгөртүү максатында, учурдагы өкмөттүн отставкасын талап кылабыз. Эл ишенимине ээ болгон, профессионал өкмөттү түзүүнү талап кылабыз. 2010-жылкы апрель жана июнь окуяларынын күнөөлүүлөрү табылып, 2012-жылдын 7-апрелине мыйзам чегинде жазаланышын талап кылабыз. Бул талаптарды аткарууга биз бийликке 15-мартка чейин убакыт беребиз.

Нааразылык акциясына, Коммунисттер партиясынын лидери Исхак Масалиев, “Ата-Журт” партиясынан Акматбек Келдибеков, Жылдыз Жолдошева сөз сүйлөштү. Чогулган элдин арасында “Мелис Мырзакматов биз сени менен!”, “Эл “Улуттар биримдиги” партиясын колдойт!” деген сыяктуу плакаттарды кармагандар болду.

Ички иштер министрлиги митинг учурунда эч кандай тартип бузуу катталбаганын, шаарда кырдаал тынч экенин кабалады. Митинг учурунда коомдук тартипти 2 миңге жакын милиция кызматкери жана элдик кошуундардын өкүлдөрү камсыз кылып турду.
 
Азаттык

Подробности
Категория: Алдын ала талдоолор
Просмотров: 1690

Бишкек, “Саясат.kg». Коргоо Кеңешинин отурумунда президент Алмазбек Атамбаев мамлекеттик бийликтин коррупцияга каршы жүргүзүп жаткан саясатын, аны менен күрөшүүнүн ыкмаларын жана жолдорун аныктап, талкууга салды.

Коррупциянын Кыргызстанга тийгизген залалын акчалай эсепке салганда, бул өнөкөт өлкөбүздү бир эле жылдын ичинде 30 миллиард сомдук жоготууга алып келгенин Кеңештин катчысы Бусурманкул Табалдиев билдирди. Мындан сырткары, учурда өлкөбүздө орун алган тымызын экономикада 130 миллиард сомго чейинки акча каражат айланып жатканын да жашырганы жок.

“Коррупция Кыргызстанды түп-тамырынан бери ээлеп, каныбызга сиңген илдет болуп калды”,- деген пикирге кошулбаган адам болбосо керек арабызда. “Жыгачтын жумшагын курт жейт, адамдын жумшагын адам жейт”, деген сөзгө, “коомдун жумшагын коррупция жейт” деп кошумча кылсак тура болчудай. Мындай дарттан кантип арылса болот, аны менен күрөшүүнүн ыкмалары барбы деги?

Барынан да кызыгы, коррупция менен күрөшүүнү коррупцияга белден батып, мамлекеттин казынасына беш саласын бирдей малып алган чиновниктердин колуна берип койгондорунда болуп жатпайбы. Бөрүгө кой кайтарткандай, бул маселеде жылт эткен жылыштарды күтсө болобу? Коррупцияга каршы күрөшүү керек  деген атка минерлердин сөзүнө кантип ишенсе болот. 20 жыл бою жеп-ичип, бюджетти тоноп, карапайым элдин эсебинен капчыктарын кампайткан адамдар бир күнү эле, уйкудан чочугансып келип, коррупцияны жок кылыаарына көз жетпейт.

«Кыргызстандын өкмөтүнүн өзү коррупцияга малынган болсо, коррупция менен күрөшүү жөнүндө кандай сөз болмок эле», деген оюн Коргоо Кеңешинин отурумунан кийин «Ата Журт» фракциясынын лидери Камчыбек
Ташиев билдирди. Анын айтымында, Президент Атамбаев коррупция менен күрөшүүгө чындап бел байлаганы билинип жатат, бирок ал аракеттер кагаз жүзүндө эле кала бербей, иш жүзүндө ашырылса жакшы болор эле. Ушуга чейин атту-баштуу аткаминерлердин бирөөсү да айыпталып, соттолгон эмес.

Кызматдарга дайындоолор дагы эле болсо таныш-билиш, тууган-урук, акчанын күчү менен бүтүп жатканын жашыруу кыйын. Демек, “коррупция өлмөк түгүл, өсүп-өнүп жатат”,- дейт Камчыбек Ташиев. Жөнөкөй, карапайым элдин арасынан чыккандардын илим-билимине карабастан бийликтин бутагына илиниши оңой эмес, бул да болсо коррупция.

Депутат Камчыбек Ташиевдин пикиринде, бүгүнкү өкмөттүн коррупцияга чыныгы каршылык көрсөтүүгө күчү да, мүмкүнчүлүгү да жок. Анткени өкмөттүн өзү коррупцияга белчесинен өйдө батып жатканы белгилүү. Өткөн жылы Өмурбек Бабановдун коррупциялык схемаларга аралышып калганы жөнүндө «Ата Мекен» фракциясы бир нече жолу айтып чыккан эле. Анан кантип ушундай күмөндөр чиновник коррупцияга каршы күрөшүүнү башкара алат.Коррупцияга каршы күрөшүү жемиштүү болушу үчүн президент мындай отоо чөптү түп-тамыры менен жулуп жок кылууга аракет кылышы зарыл. Мисалы, бүгүнкү өкүмөттү толугу менен отставка кетирип, парламенттик коалицияны кайрадан түзүп, жаңы өкмөт дайындалышы абзел. Ошондо гана коррупцияга каршы күрөштүн алгачкы кадамдары жасалды десе болот. Ага чейин, атка минерлер оң колу менен өтө чөп жулуп, сол колу менен пара алып жата бериши турган кеп.

Бирок Президенттин мындай радикалдуу кадамдарга күчү да, саясий эрки да жетер бекен? Же коррупция менен күрөшүү урааны элге арналган кезектеги «короз кант» бойдон кала береби?


                                     


 

Подробности
Категория: Алдын ала талдоолор
Просмотров: 2148

Бишкек, “Саясат.kg”. Өздөрүн айга-күнгө канча теңебесин, чндыгын айтканда, бийлик башындагылардын абалы суктанарлык эмес. Башкасын айтпаганда да, элдик казынанын кырмычыгы гана калып, социалдык төлөмдөрдү, айлык акыларды төлөө ушу жазга жетпей чоң маселеге айланчудай. 2011-жылдын тартыштыгынын өзү эле 20 млрд. сомго жеткенинен деле көп нерсени байкаса болот. Ошондуктан, экономика жаатындагы эксперттер абалдын мындан ары кандай өңүттө өнүгөөрүн айткысы келбей, журналисттерден желмогузду көргөндөй качышууда.
 
Мындан тышкары, бийлик быйылкы кышка даярдыкты үзгүлтүккө учуратты. Ош окуясынын, 7-апрелдеги ыңкылаптагы кан төгүүлөрдүн чыныгы күнөөкөрлөрү жазасын ала элек. Азыртан эле “7-апрель баатырлары” бийликке ыдык көрсөтүп, апрелде күнөөкөрлөрдү жазалагысы келбеген аткаминерлерге катуу талап коюуга камданышууда. Аларга Ош окуясында бир тууганынан ажыраган адамдар кошулууга даяр. Ошону эске алганда, жазында абалдын курчушу толук ыктымал.
 
Бизге түшкөн маалыматка караганда, президенттик администрацияны тегеректеп жүргөн кеңешчилердин бири элди алаксытуу максатында парламентке бүт күнөөнү оодарып, таркатып, жаңы шайлоону дайындоону сунуштаптыр. Азырынча Атамбаевдин кандай чечим кабыл алары белгисиз.
Подробности
Категория: Алдын ала талдоолор
Просмотров: 3273

Бишкек, “Саясат.kg”. Сыягы, экинчи ирет революция жасаган карапайым кыргызстандыктардын жакшы жашоого жетебиз деген үмүтү бул ирет да таш капты окшойт. Макстына  жетүү үчүн эки кандуу окуянын күнөөкөрү болгон азыркы эл башчылары шайлоо алдында адаттагыдай эле «алтын тоону» убада кылышкан менен эч бир чеке жылытарлык иш жасала элек. Адатта ар бир бийликке жеткен президент же премьер-министр алгачкы кадамын экономикалык реформадан баштоого тийиш болчу. Айрыкча жумушсуздук кара тумоодой каптап турган Кыргызстандын азыркы абалына кичи ишканаларды ачып, жергиликтүү өндүрүштү жандандыруу аба менен суудай зарыл. Болгондо да Бажы союзуна кирүү алдында турган биз үчүн алып-сатарлыктан акыры өз продукциябызды өндүрүүгө өтпөсөк, биротоло «банкрот» болуп, мамлекеттүүлүгүбүздүн түбү түшүп калышы мүмкүн.
 
Тилекке каршы азыр бизде кай жагыңды карабагын кыскартууга туш болосуң. Бүгүнкү күндө Кыргызстанда кыскарбаган иттин куйругу эле калды окшойт. Ооба, балким чиновниктердин армиясын азайтып, бири-бирин кайталаган, жеке ишкерлерге бут тосуп, коррупцияны гүлдөткөн айрым мамлекеттик структураларды оптималдаштыруу, аларга кеткен тейлөө, кызматтык автомашиналардын чыгымын азайтуу керектир. Бирок биздин «билермандар» элди алагды кылуу, башын айландыруу амалында  кадыресе эле бул көрүнүштү чоң шоу компанияга айландыруу менен алектенишүүдө.
 
Мамлекеттик мекемелердеги «ашка жүк, көчкө жүк» болгон «мите курттардан» арылуу өнөктүгү ушунчалык күч алып, кудум эле беш жылдык планды аткарып жаткандай шардана кылышууда. Эгер алдын ала айтылган цифраларга ишенсек, бир эле өкмөттүн курамындагы мамлекеттик мекемелердин өзүнөн жаңы жылдын алгачкы иш күнү 2300 кызматкер көчөдө калды. Эгер алардын ар биринин артында 5-6дан адамды түзгөн үй-бүлөсү бар экендигин эске алсак, 15 миңдин тегерегиндеги жарандарыбыз эртең кантип жашайбыз деп жегени желим, ичкени ирим болуп отурушат. Мындан тышкары казинолордун жабылышынан да жумушсуздардын катарына дагы 15 миң адам  кошулду.
 
Ошол баарыбыз жерден алып, көргө, көрдөн алып жерге уруп жамандаган Акаев менен Бакиевдин тушунда деле өздөрүн бийликке алып келген (биздеги шайлоолордо жеңишке негизинен мамлекеттик чиновниктердин күчү менен жетишет эмеспи…) бюджеттик кызматкерлерди «иши бүтүп, эшеги ылайдан өткөн соң» кереги жок буюмдай көчөдө калтырышкан эмес. Ал кездерде кызматынан кыскаргандар  жеке ишкердүүлүк менен алектенем десе кредит, ссуда берилип, жок эле дегенде үч айлык маянасын алчу. Бирок бүгүнкү «Остап бендерлер» башына келген амалкөй бийлик оозуна кум куюп алгансып унчукпайт.
 
Менимче бир дагы мамлекетте өз жарандарына, болгондо да өлкөнүн күрөө тамырын кармап турган ишке жарамдуу жаштарга мындай кайдыгер мамиле жасалбаса керек. Коррупция менен жердешчилик, эки жүздүүлүк менен шылуундук салтанат курган азыркы Кыргызстанда башканы элестетүүгө мүмкүн эмес деңизчи. Бирок тирүүлөрдү ойлобой эле коюшсун, баарынан да жакшы жашоого артыбыздагылар жок дегенде жетип калсын деп  Ак үйдүн алдында жаны кыйылган 90 азаматыбыздын убалы кимге?
 
Мындай көрүнүш кайра эле бүгүнкү бийликтин компетентсиздигин, мамлекетти башкарууга жөндөмсүздүгүн жана орто, төмөнкү  звенодогу кызматкерлерди керек учурда пайдаланып, «соодасы бүткөндөн» кийин көчөгө кууп чыгарууга жөндөмдүүлүгүн далилдеп турат. Эгер алар ошондой эле элдин эртеңин, мамлекеттин экономикасын көтөрүүнү ойлошсо, анда административдик реформаны шайлоонун алдында эле башташпайбы (парламенттик, президенттик шайлоолордон мурда деле ушулар бийликте болчу).
 
Мамлекеттик мекемелердин кызматкерлерин кыскартуу өзүнчө эле өнөктүк экендигин ушундан билиңиз, Ак үйдөн ар бир министрлик менен ведомстволорго алдын ала канча кызматкерди кыскартуу тууралуу «план» берилген. Орто эсеп менен ар бир министрликтен 300гө жакын адам жумушу менен кош айтышууда. Бирок ушунча адамдын мурда аткарып келген жумушун калгандарга жүктөп коюп, аларга кошумча иштегендигиүчүн кошумча маяна төлөп берүүнү да «унутуп»  коюшкан. Бул эмгек кодекси менен келишимин бузгандык болуп саналат. Кыскарууга туш болбогондор да бул жагдайды билген менен ичинен сызып, айласыз унчукпай турушат.
 
Болгону ошол кыскартуулардан өкмөт өнтөлөп отуруп 1  миллиард сом үнөмдөйт экен. Мамлекеттик деңгээлде алып караганда бул сумма болбогон эле каражат. Баса, өткөн жылы, шайлоонун алды, артында алар бюджеттеги 26 миллиард сом тартыштыкты толтуруп койдук деп сурнайын тартып, барабанын даңкылдатып жатышпады беле. Эми шайлоодон кийин эле зыкымданып, ушул болор-болбос акчаны санап калгандары таң каларлык. Акаев, Бакиев бийлигинен айырмаланып, коллективдүү, жоро-жолдоштор менен достор  же региондук кландар башкарган бийлик эси болсо жок дегенде жаз алдындагы митинг «сезонун» ойлоп, тез арада жеке ишкердүүлүктү өнүктүрүүгө шарт түзүп, жумушсуздукту тап душмандай жоюуга шымалана киришүүгө тийиш. Антпесе коомдогу ансыз деле жарылуу абалында турган жагдай оорлоп кетери айтпаса да түшүнүктүү.
 
Дүйнөлүк практикада 20% тегерегиндеги жарандары жумушсуз калган мамлекет банкрот, бийлик башындагы өкмөт компетентсиз деп таанылат экен. Ал эми бизде азыр жумушсуздардын саны канча? Менимче, мамлекеттин кагаз жүзүндөгү «расмий» статистикасын эмес, турмуш чындыгын алып караганда 50%дан кем эмес. Түштүктөгү ар бир үй-бүлөдө бирден, көпчүлүгүндө экиден адам Россияда же Казакстанда мигрант болуп, ит ичпестин суусун ичип, көрбөгөн азапты көрүп, бала-чакасын, демек мамлекетти багып жатат. Эми жаңы жылдан кийин күнүмдүк жашоосуна араң каражат таап иштеп жүрүп кыскартууга туш болгондор Россия, Казакстанга кетишеби же митингчилердин катарын толуктайбы…
 
Асан Тилеков
 
 
 
 

Подробности
Категория: Алдын ала талдоолор
Просмотров: 9511

 
 
 
Бишкек, “Саясат.kg”. Өткөн жылдын акыркы күндөрүндө (29-декабрь) карапайым калк  жаңы жылды тосуу түйшүгүн  тартып, жаңы кызматка дайындалган чиновниктер майлуу ордун майлап бүтөлбай жаткан мезгилде Лейлек районунун Андарак айылында кыргыз, тажик улутундагы жаштардын мушташы аз жерден улуттар аралык жаңжалга айланып кете жаздады.

Подробности
Категория: Алдын ала талдоолор
Просмотров: 3010

 Бишкек, “Саясат.kg”. Биз, өз окурмандарыбыздан “Өкмөттүн кышка даярдык боюнча ишин кандай баалайсыз?”,- деген суроого жооп берүүсүн суранганбыз. Сайтыбыздагы добуш берүүнүн жыйынтыгы жалпы элдин бул маселе боюнча көз карашына дал келгендигин белгилеп коёлу:
 
Канаттандыраарлык - 5%
 
Канаттандыраарлык эмес - 25.3%
 
Жооп берүү кыйын - 69.7%

Добуш берүүгө жалпысынан 502 окурман катышкан.
 
Биздин комментарий: Ансыз деле өкмөттүн кышка даярдыкты үзгүлтүккө учуратканы көптөгөн фактылар менен далилденип турган. Жарыктын туруктуу берилбегендигинен калк ичиндеги нааразычылык ого бетер арбыды десек аша чапкандыкка жатпайт. Добуш берүүнүн жыйынтыгы деле ошону далилдеп турат, буга болгону 5 пайыз гана окурмандын “канаттандырарлык” деп жооп бергени таасын далил.
 
Иш жүзүндө, бул нааразычылыктын чеги жок, эмне менен бүтөрү да белгисиз. Себеп дегенде, 2010-жылдын 7-апрелиндеги элдик ыңкылаптын башкы талабынын бири да ушул жарыктын өчүшү, баалардын кескин асмандашы болгон. Жаңы бийлик деле башкы энергетик Аскарбек Шадиевдин оозу менен, “бааны көтөрбөсөк, энергетика тармагын өлтүрүп алабыз”,- деп жатпайбы. Дал ошондуктан, бийликте кичине бет болсо, элге карай бурулуп, коомдогу үйүлүп калган маселелелерди чечүүнүн жолун издеши керек. А бирок, булар дагы деле, эскиче, элдин түйшүгүн элдин акчасына чечүүгө кам ургандай. Буларга не дейбиз: бали, баракелде... Бакиев заманын эске салганыңар үчүн рахмат!
 
Подробности
Категория: Алдын ала талдоолор
Просмотров: 1551

Бүгүн эртең менен,  "Сасаят.kg" маалымат агенттиги: «Бул атактуулардын кимиси “Жылдын саясатчысы – 2011” наамына татыктуу?» аттуу электрондук добуш берүүнү жыйынтыктады. 1-декабрдан 25-декабрга чейин өткөрүлгөн  электрондук баракчада добуш берүүнүн негизинде төмөндөгүдөй жыйынтык чыгарылды:

 

 Роза Отунбаева - 3.3%
Алмазбек Атамбаев - 8.8%
Камчыбек Ташиев - 33.8%
Адахан Мадумаров - 13%
Феликс Кулов - 15%
Өмүрбек Суваналиев - 5.8%
Темирбек Асанбеков - 7.5%
Азимбек Бекназаров - 5.5%
Ахматбек Келдибеков - 4.4%
Өмүрбек Бабанов - 2.5%
Өмүрбек Текебаев - 0.5%
 
Добуш бергендердин саны: 1247
 
Окурмандарга белгилүү болгондой, "Сасаят.kg" маалымат агенттигинин негизги барагында өткөрүлгөн электрондук добуш берүүнүн жыйынтыгында:
 
1.      Биричи орунга 33,8%  добуш менен  белгилүү саясатчы Камчыбек Ташиев чыкты.
2.      Экинчи орунга  – Феликс Кулов –  15% добуш менен.
3.      Үчүнчү орунга – Адахан Мадумаровв – 13% добуш менен.
4.      Төртүнчү – Алмазбек Атамбаев – 8,8% добуш. 
5.      Бешинчи – Темирбек Асанбеков – 7,5% добуш.
6.       Алтынчы – Өмүрбек Суваналиев – 5,8% добуш.
7.      Жетинчи – Азимбек Бекназаров – 5,5% добуш.
 
“Жылдын саясатчысы” электрондук добуш берүүнүн калган катышуучулары 5 пайыздан төмөн добуш алышкан. 
 
 
Подробности
Категория: Алдын ала талдоолор
Просмотров: 4167

 

Бишкек – “Саясат.kg”. Президенттик шайлоого саналуу гана убакыт калды, коомчулукту кызыктырган бир эле маселе ким төртүнчү президент болот, кимге добуш беребиз?
 
Өлкөнүн кайсы бурчу болбосун баарын ушул суроо кызыктырууда. Кимиси болсо да тартип, тынчтык болуп, заманыбыз оңолгону болсо экен деп тилешет.
 
Ага деле карабай бийликтин жасакерлери кокуй төртүнчү президент азыркы премьер болот, анда шанс бар деген сыяктуу алдын ала жооруп, болуп калса устукандан кемирчеек ашар бекен, эптеп илешсем болду  деген пикирде эксперт да, саясатчы да болушуп, тим эле сурамжылоонун жыйынтыгы дешип өздөрүн өздөрү алдап турган кези.
 
Бирок, ар бир адамдын маңдайына жазган жолу бар ошол жол менен барасың, калганы колуңдан келбейт, Ала-Тоонун чокусуна чыга албайсың, Ысык-Көлдүн түбүнө жете албайсың ар нерсенин мыйзамы бар дегендей, эл өз баласын шайлап алат.
 
Чыныгы талдоочулардын пикирин уксак,  укук коргоочу Чолпон Жакупованын айтымында,  2011-жылдагы шайлоонун өзгөчөлүгү, кимдин президент болоору белгисиз болуп жатат. Ал эми 2009-жылдагы жана андан мурдагы шайлоолордо 90 процент Курманбек Бакиев же Аскар Акаев шайланат деген кепилдик бар эле. Бул ирет андай кепилдикти Алмазбек Атамбаевге ыйгарууга мүмкүн эмес. Мындайча айтканда эртең ким президент болуп калаарын айта албайбыз.
 
  Ал эми  административдик ресурс жакшылап эффективдүү иштеши үчүн күчтүү бийлик болушу керек. Ал эми Кыргызстанда мамлекеттик бийлик жокко эсе. Баарынан дагы шайлоонун алдында шашылыш түрдө шаарлардын мэрлерин кайра шайлоо, сотторду алмаштыруу процесстери жүрүп жатканы дагы кокустук эмес. Мына ошол кызматтан кеткен адамдар дагы Атамбаевге чечкиндүү түрдө каршы иштешээри бышык. Ал эми түштүк эли былтыркы кандуу коогалаңды унута элек. Мына ушундай жагдайда шайлоого бара жаткан премьер-министр утуп чыгат деп айтыш өтө эле кыйын.
 
Бул туура, апрелден кийин көпчүлүк мекемелерде күчтүү адистер Бакиевге иштебесе деле, бакиевчил ат менен тазаланып, кызматтарга тажрыйбасыз, ал түгүл эл менен иштегенди билбеген эле тааныштарын ишке койушкан. Алар кайсы жумушта эмне кылып жүргөнүн азыр да толук биле элек. Ошол себептүү президентти, премьерди жана башка чоң кызматтагыларды ушундай абалга алып келишти. Бул торго мурдагы эки президент да кандай түшкөнүн байкабай калышкан. Тарых кайталанат деген ушул да.
 
Бийликте күчтүү адистер жокко эсе, баары эле убактылуу маанйда. Эртең башка президент келсе кетишет, себеби азыр мамлекеттик кызматкерге эч кандай кепилдик берилген эмес. Мындай шартта административдик ресурсту колдонуунун деле мааниси жок. Кечээ Бакиев ресурс колдонду деп кыйкырып келип, бүгүн өздөрү колдонгонун эл көрүп жаткандан кийин айтат да, “ай сенин эмнең артык?” деген суроо туулат деп да ойлош керек. Тазалануунун бир эле жолу таза шайлоо өткөрүү, эл кимди шайласа ошого жол берүү, эч кандай тоскоолдук кылбоо. Болбосо кыйын болуп калат, элди эки жолу алдашты, эл азыр даанышман, баарын көрүп турат.
 
Төртүнчү президент ким болбосун, башкаруу системасына күчтүү, таза жана тажрыйбалуу адистерди чакырып эл үчүн иштөөгө толук шарттарды түзүп берүүсү керек. Ансыз ал деле мурдагылардын кейпин бат эле кийет. Элди алдайт, же аны алдагандай кылып көрсөтүшөт, кечээ жакында премьер-министр шайлоодо администрациялык ресурс колдонулбайт деп айтса, эки күн мурун анын партиялашы Бишкек мэри президенттикке талапкердин үгүт материалдарын автобустардан чапталган жеринен тытып алдырыптыр, болгондо да түн жарымда, кимден бекинип жасаганы белгисиз.
 
Макул, автобуска чаптаса болбойт дейли, анда калган автобустагы рекламаларды эмнеге тыта албайт? Эл көрүп турбайбы.
 
Кызыгы ошол материалдары тытып койсо эле маселеси чечилип калабы, чынында эл талапкерди тандаганда алардын үгүт материалдарына же берген акча, убадаларына деле анча кызыгышпайт. Эл өзү ким президент болорун жана кандай иштерин сезет.
 
 
 
 

 

Подробности
Категория: Алдын ала талдоолор
Просмотров: 2681

Бишкек – “Саясат.kg”. Ошентип алдыдагы 20 күндүн ичинде 78 талапкердин канчасы калып, канчасы шайлоого чыгары белгилүү болот. Президентти шайлоо кампаниясынын биринчи этабы аяктады. Баары болуп 80ден ашуун талапкер өзүнүн президенттик шайлоого чыгаарын ачыктап, алардын кээ бирөөлөрү кайра тартты. Азыркы күндө 13 талапкер шайлоого катышуу үчүн белгиленген 100 миң сом акчасын төгүштү. Кийинки этапта, ушул эле 100 миң сомдон акча, 30 миң кол топтоп, мамлекеттик тил сынагынан өтүү шарттары каралган. Бул тепкичтерден кимиси өтөт, кимиси өтпөйт аз убакытта коомчулук баарына күбө болору шексиз.

 

Үчүнчү этабы үгүт иштери менен аяктайт. Бул эң маанилүү жана жыйынтыктоочу этап. Үгүт иштери жүрүп жатканда талапкерлердин чыныгы мүмкүнчүлүктөрү, элдин маанайы жана бийликтин иш-аракеттери белгилүү болот.
 
Президенттик шайлоо эки жол менен өтөөрү күтүлүүдө. Биринчиси – бул Кыргызстан үчүн тынч жана адилет шайлоо, эгерде ар-бир талапкер өз алдынча катышып, өз күчүн шайлоодон тактап алышы.
 
Экинчиси – талапкерлер тандем түзүп, бири-бирин колдоого алуусу. Бул жол деле Кыргызстан үчүн тынч шайлоо болушу мүмкүн, бирок, мындай жолдун жыйынтыгы тандемге баруучу саясатчылардын жеке жоопкерчилигине байланыштуу. Эгерде тандем түзүлүп, эки саясатчы бири-бирин колдоп, жакшы программа менен чыгып, эл биримдигине доо кетирбегидей болушса, албетте бул туура жол. Бирок айрым саясатчылар өз кызыкчылыгы үчүн мамлекеттин бүтүндүгүнө доо кетирип, эки киши түзгөн тандемди, түндүк-түштүк тандеми деп чыгышса, анда ал тандемдин түзүлүшү Кыргызстан үчүн олуттуу.
 
Саясатчы Топчубек Тургуналиев айткандай, тандем түзүү түндүк-түштүк бөлүнүүсүн мыйзамдаштыруу болуп калышы ыктымал. Андыктан тандем, жеке эки талапкердин ортосундагы келишим катары каралып, ал региондук жа аймактык бөлүп жарууга багытталбаса, анын жыйынтыгы жана келечеги максатка ылайыктуу болмок.
 
Акыркы кездерде, массалык маалымат каражаттарында талапкерлерди каралоо же болбосо буйуртма материалдар орун алууда. Бирөөсүн эмдигиче программасы жок десе, экинчисин убадачы популист, үчүнчүсүн наркобарон кылып көрсөтүүдө. Албетте, ар бир макала такталбаган, же болбосо анонимдик булактан, башкалары болжол менен аткарылган. Чын чынына келгенде элибиз жыйырма жылда сасатты жакшы таанып, кайсынысы жалган, кайсынысы чын экендигин баамдап калды. Бирок ошентсе да, кээ бир саясатчылардын колдоочу топтору “кир” технологияларды кенен колдонууда.
 
Кир кол менен таза колдун айырмасындай эле бул технологиялардын да акыр аягы эмне менен бүтөөрү журтубузга белгилүү. Элде илгерттеден келе жаткан кеп бар: “эмне менен баштасаң, ошону менен бүтөсүң”. Демек, ким таза баштап, жеке өзүнүн гана үгүт иштери менен болуп, башкаларды каралабаса, башкалардын жылдыздары да ошого ооп түшөт.
 
Ошол эле мааалымат каражаттарына көз жүгүртсөк, көпчүлүгүндө талапкерлердин Россия мамлекетине жагынып колдоо телектери байкалса, айрымдары батыш тарапка ыктаганы да көрүнүүдө. Канткен күндө да талапкерлерибиз биринчи кезекте кыргыз эли жана мамлекетинин кызыкчылыгын жогору коюшса, чыныгы президент шайланышына ишенүүгө болот.
 
Маселе - эртең ким президент болгонунда эмес, бүрсүгүнү ал кандай иштейт? Мына ушул суроодо болуп турат. Кыргызстандын эгемдүүлүгүнүн түптөлүүсүнүн 20 жылдыгында, бир эмес эки президент башкарып, эмне менен бүткөнү кыргыз элине али да өкүнүчтүү. Парламенттик башкарууга өткөнүбүзгө бир жылдан ашуун убакыт өттү бирок, өнүгүү жок.
 
Демек, Кыргызстандын өнүгүүсү үчүн башкаруунун формасынын эч кандай тиешеси жок. Ал башкаруучунун жеке жоопкерчилигине гана көз каранды. Мамлекет президент үчүн иштебестен, президент  мамлекет үчүн гана иштесе, ошондо өнүгүү болушуна кепилдик түзүлөт. Ал эми мамлекет жеке адамдын жашоосуна, анын келечегине жана өнүгүүсүнө жагымдуу шарттарды түзүп берүүсү керек.
 
Ошондуктан алдыдагы президенттик шайлоодо, кыргыз элине күйгөн, мекенчил, жоопкерчиликтүү, курч патриот жаштардын шайланышы Кыргызстандын өнүгүүсүнүн негизги шарты катары байкалууда. Себеби өлкөдө тартип жок. Паракорчулук күчөп кеткен. Бийлик алсыз. Болочок президенттин биринчи иш-аракети: өлкөдө тартипти, стабилдүүлүктү орнотуп, паракорчулукту жойуу болуп турат.
Подробности
Категория: Алдын ала талдоолор
Просмотров: 2454

Кечээ эртең менен,  "Сасаят.kg" маалымат агенттиги “Эгерде эртең Президенттик шайлоо болсо, кимге добуш бересиз?” аттуу электрондук добуш берүүнү жыйынтыктады. Үч ай бою  электрондук баракчада добуш берүүнүн негизинде төмөндөгүдөй жыйынтык чыгарылды:

 

1.      Биричи орунга 36,5%  добуш менен  Камчыбек Ташиев чыкты.
2.      Экинчи орунга  – Адахан Мадумаров –  22,1% добуш менен.
3.      Үчүнчү орунга – Өмүрбек Текебаев – 15% добуш менен.
4.      Төртүнчү – Темир Сариев – 4,6% добуш. 
5.      Бешинчи – Алмазбек Атамбаев – 4,3% добуш.
6.       Алтынчы - Роза Отунбаева – 3,5% добуш.
7.      Жетинчи – Мелис Мырзакматов – 3% добуш.
8.      Сегизинчи – Аликбек Жекшенкулов – 1,4% добуш.
9.      Тогузунчу – Феликс Кулов – 1% добуш.
10. Онунчу – Өмүрбек Бабанов – 0,8% добуш.
11. Баарына каршы – 7,8% добуш, баары болуп 628 окурман добуш берген.
 
Ал эми орус тилинде добуш берүүгө коюлган баракчанын жыйынтыктары:
 
1.      Биринчи орунга 30,2% добуш менен Камчыбек Ташиев чыкты.
2.      Экинчиде – Адахан Мадумаров – 19,3% добуш.
3.      Үчүнчүдө – Алмазбек Атамбаев – 12,1% добуш.
4.      Төртүнчүдө – Өмүрбек Текебаев – 8% добуш.
5.      Бешинчиде – Роза Отунбаева – 3,7% добуш.
6.      Алтынчыда – Мелис Мырзакматов – 2,7% добуш.
7.      Жетинчиде – Өмүрбек Бабанов – 2,5% добуш.
8.      Сегизинчиде – Феликс Кулов – 2,3% добуш.
9.      Тогузунчуда – Темир Сариев жана  Аликбек Жекшенкулов –  2% добуштан.
10. Баарына каршы - 14,7%. Баары болуп 1429 окурман добуш берген.
 
ДОБУШ БЕРҮҮ АЧЫК ЖАНА КИЙЛИГИШҮҮСҮЗ ӨТКӨРҮЛДҮ
 
Өзүңүздөр көрүп тургандай, орусча жана кыргызча барактарды салыштырмалуу суммада добуштарын эске алганда, Кыргыз Республикасынын президенттигине талапкерлердин ичинен - биринчи орунда Камчыбек Ташиев, экинчиде - Адахан Мадумаров, үчүнчүдө – Өмүрбек Текебаев жана Алмазбек Атамбаев, төртүнчүдө - президент Роза Отунбаева, бешинчиде – Мелис Мырзакматов.
 
Кыскача мунөздөсөк, Камчыбек Ташиевдин биричи орунга чыгышы (36,5% жана 30,2%), анын принципиалдуулугу, элдин кызыкчылы үчүн тайманбастыгы, Кыргызстандын бүтүндүгү жана бөлүнбөстүгү жөнүндөгү позициясы, өткөн жылкы апрелдеги жана июньдагы коогалардын күнөөлүүлөрүн жазага тартуу талабы, бийликтин кемчиликтерин ачык сынга алуусу жана июнь коогасында эки тараптуу кан төгүүнү токтотуусунун таасиринен. Мындан тышкары, ал Кыргызстандын жаңы муунунун, кири жок, иш билген башкаруучуларынан. “Ата-Журт” партиясынын лидери, ушундай аттагы парламенттик фракцияынын жетекчиси. Парламенттик шайлоодо анын партиясы биринчи орунду алган.
 
Экинчи орунда – Адахан Мадумаров (22,1% жана 19,3%), элде айтылгандай, Акаев жана Бакиевди алып келебиз, дегенден кийин, акаевчилер жана бакиевчилер учурда колдоо көрсөтүп жатышат. Мыкты оратор, убудачыл жана Путин колдоо көрсөтүудө, ага машиналар, жансакчылар келүүдө жана ушундай такталбаган маалыматтар көп таркалууда. Өткүр саясатчы, мурдагы муундагы чоң кызматтарды аркалаган. “Бүтүн Кыргызстан” партиясынын лидери. Парламенттик шайлоодо партиясы өтпөй калган.
 
Үчунчү орун Текебаев менен Атамбаевдин ортосунда.
Өмүрбек Текебаев атаандашынан орусча баракчада бир аз артта калганы менен кыргызчасында 3,5 эсе алдыга чыккан (15% жана 8%). Тажрыйбалуу саясатчы, Конституциянын атасы, өмүр бою адилеттүлүк үчүн күрөшүп келет, Акаевдин башкаруусунан бери  биринчи оппозиционер. Анын “Ата-Мекен” партиясы чоң муундун туруктуу жана активдүү партиясы болуп эсептелет. Парламентте эмгеги сиңирген депутат. “Ата-Мекен” партиясынын лидери жана ушундай аттагы парламенттик фракциянын жетекчиси. Парламенттик шайлоодо анын партиясы бешинчи орунду ээлеген.
 
Ушул эле даражада Алмазбек Атамбаев, атаандашынан орус барагы боюнча бир орун жогору турса, кыргыз баракчада эки орун төмөн позицияны ээлеген (4,3% жана 12,1%). Сыягы, аны премьер-министр катары, бюджет кызматкерлери көбүрөөк колдосо керек. Анын абройуна тамак –аштын, күйүүчү-майлоочу заттардын, бензиндин жана ушундай керектелүүчү заттардын бааларынын кымбаттоосу, бийликтеги жетекчилердин алсыздыгы таасирин тийгизип жатса керек. Ал тургай анын командасы да аны көбүнэсе жаман көрсөтүп жаткандай. Ачык эле үгүт иштерин жүргүзүүдө деген сөздөрдүн келип чыгышына аша чаап мактап шарт түзүп жатышкандай. КСД партиясынын лидери, иштеп жаткан премьер-министр, анын партиясы парламенттик шайлоодо экинчи орунду алган.
 
Төртүнчү орунду перзидент Роза Отунбаева татыктуу ээледи (3,5% жана 3,7%). Мындай даражага, анын өткөн жылкы кандуу бийлик алмашууда, эч ким президент катары башкарууга даай албай турганда, чоң жоопкерчиликти мойнуна алып, өлкөдө башаламандыкка жол бербөөсү жана мен шайлоого барбайм, жаңы шайланган президентке бийликти тынч жана мыйзамдуу өткөрүп берем деп айтып чыгуусу оң таасирин берди.
 
Ал эми бешинчи орунга Ош шаарынын мэри Мелис Мырзакматов чыкты. Өткөн жылкы июнь коогасында Ош шаарынын тургундарынын алдында эмгеги сиңирген, ал окуялар тууралуу китеп чыгарды, бирок, шайлоого өз талапкерлигин койгон жок. Мурдагы парламенттин депутаты.
 
Добуш берүүнүн жыйынтыктарын эске алуу менен, 80ден ашуун талапкерлер катышып жаткан президенттик шайлоодо негизги саясий күрөш алардын  ичинен ушул тизмедеги биринчи төрт талапкердин ортосунда жүрөт десек болот.
 
Мындай талдоону кечээ россиялык эксперт Алексей Власов да айтып чыкты.
 
Эгерде добуш берүүнүн жыйынтыктарын алдын ала талдоо катары карай турган болсок жана президенттик шайлоо да ушундай ачык жана эреже бузуусуз өтө турган болсо, анда шайлоонун жыйынтыгы аныкталгандай.