Ош облусу боюнча суу пайдалануучулардын сугат сууга болгон кызмат акысынын карызы 7 млн 386 миң 500 сомду түзөт. Бул тууралуу облус губернатору Сооронбай Жээнбеков билдирди, деп маалымдады «Баракелденин» түштүк аймагы боюнча өкүлчүлүгүнүн кабарчысы.

Суунун кызмат акысы үчүн эң көп карыз Кара-Суу районунда орун алып, 6 млн 839 миң 500 сомго жетип, райондогу Сарай, Ак-Таш, Нариман, Кашкар-Кыштак, Шарк, Жоош, Отуз-Адыр, Сары-Колот, Мады айылдык округдары ири суммадагы карыздарын төлөбөй келүүдө», - дейт С.Жээнбеков.

Бул багытта ал бардык суу пайдалануучулардан төлөм каражаттарын тез арада топтоону уюштуруу жана каражатты ишке салуу керектигин боюнча тиешелүү кызматтарга тапшырма берди.

  Баракелде

 

Жогорку Кеңештин «Ата Мекен» фракциясынын депутаты Асия Сасыкбаева радиоактивдүү көмүр боюнча комиссия түзүүнү 1-февралда пленардык жыйындын алдында өтүндү.

«Азыр радиоактивдүү көмүрлөр мектептерге берилип кетти. Эми губернатор ал көмүрлөрдү кайра ТЭЦке ташыйм деп айтып жатат. Ал радиоактивдүү көмүрдөн чыккан күл 3-4 эсе зыян деп айтылууда. Ошондуктан, бул маселе боюнча комиссия түзүп, ал көмүрлөрдү утилизация кылууну колго алсак», - деди ал.

Ал эми депутат Анарбек Калматов радиоактивдүү көмүр боюнча чоң кызматтагы адамдар аралашкан деди.

  Баракелде

 

 Кечээ, 31-январда саат 11:40тан баштап 12:00гө чейин артиллериялык топ Бишкек-Ош унаа жолунун 255-чакырымында 5 жолу аттыруу жүргүзүп, жалпы көлөмү 5 миң куб метр өлчөмүндөгү кар көчкү түшүп унаа жол убактылуу жабылган. Бул тууралуу ӨКМдин басма сөз кызматы билдирди.

Маалыматка ылайык, саат 13:45тен баштап саат 14:34кө чейин артиллериялык топ Бишкек-Ош унаа жолунун 248-чакырымында 12 жолу аттыруу жүргүзүп, бирок кар көчкүсү түшкөн эмес. Саат 15:32ден баштап саат 15:47ге чейин артиллериялык топ Бишкек-ош унаа жолунун 246-чакырымында 6 жолу аттыруу жүргүзүп, жалпы көлөмү 11 миң 500 куб метр кар көчкү түшүп, унаа жолуна жеткен эмес.

Белгилей кетсек, көчкүлөрдү атайылап атып түшүрүү иштерин аткарып жаткан ӨКМдин ыкчам тобу Бишкек-Ош унаа жолунун 238-чакырымындагы «Итагар» кар көчкү изилдөөчү станциясында жайгашкан.

Ошол эле күнү саат 17:50дөн баштап саат 18:15ке чейин артиллериялык топ Ала-Бука-Жаңы-Базар-Кировка унаа жолунун 69-чакырымында 5 жолу аттыруу жүргүзүп, жалпы көлөмү 200 метр кубка жеткен кар көчкүсүн түшүргөн.

Маалымат боюнча, саат 18:45тен баштап саат 19:15ке чейин артиллериялык топ Ала-Бука-Жаңы-Базар-Кировка унаа жолунун 71-чакырымында 3 жолу аттыруу жүргүзүп, бирок кар көчкүсү түшкөн эмес.

Кар көчкүлөрүн атайылап түшүрүү боюнча иш алып барып жаткан ӨКМнин ыкчам тобу жана артиллериялык топ Жаңы-Базар айылындагы «Эко-Центр» мейманканасында жайгашкан.

  Баракелде

 

Кечээ, 31-январда болжол менен саат 01:00дөр чамасында Талас облусунун Талас районунун Беш-Таш суусундагы «Контрабанда» суу бөлүштүргүчүнөн суу ташып, Кара-Дөбө айылындагы 10 турак үйдүн короо сарайларын суу каптаган. Бул тууралуу ӨКМдин басма сөз кызматы билдирди.

Маалымат боюнча, кырсык болгон жерге Жарандык коргонуу комиссиясынын биринчи орун басары жетектеп барган топ, айыл тургундарына түшүндүрүү иштерин жүргүзүү менен бирге айыл өкмөт башчысына Беш-Таш суусундагы «Контрабанда» суу бөлүштүргүчүн жабуу тууралуу тапшырма берилди.

  Баракелде

 

 Бишкек – “Саясат.kg”. КР Өзгөчө кырдаалдар министрлигинин басма сөз кызматына караганда Кыргызстандын тоолуу райондорунда, Ош жана Жалал-Абад облустарынын тоолуу унаа жолдорунда кар көчкүсүнүн түшүүсү   жана жолдордун тайгак болушу күтүлүүдө.

Министрлик коопсуздукту камсыз кылуу максатында айдоочулар тоолуу авто жолдорундо 500 метр аралыкты сактоону эскертет.

 

31-январда, КР Премьер-министри Өмүрбек Бабанов TeliaSonera компаниясынын президенти Нюрберг Ларс Гуннар жетектеген делегацияны кабыл алды.

Жолугушуу учурда Нюрберг Ларс Гуннар Өкмөт башчысына компаниянын иштери тууралуу айтып берди жана Кыргызстандын экономикасына өзгөчө телекоммуникация тармагына инвестиция салууга кызыкдар экендигин айтты.

Премьер-министр Кыргызстан өлкөнүн рыногуна киргиси келген инвесторлор менен иштешүүгө даяр экендигин айтты.

“Кыргызстан инвесторлорду кабыл алууга даяр. Бизде инвестиция үчүн жакшы шарттар түзүлгөн. Өкмөт тендерлердин ачык-айкын жүргүзүлүшүно кепилдик бере алат”, - деди Ө.Бабанов.

Кабар

 

Украинада катуу сууктан 5 күндүн ичинде 30 киши тоңуп өлдү. Бул маалыматты өлкөнүн чукул кырдаалдар министрлиги бышыктады. Буту-колун үшүккө алдырган дагы 500дөй киши  доктурларга кайрылышкан. Жапа чеккендердин көбү үй-жайсыз селсаяктар деп айтылууда. Украинанын айрым жерлеринде абанын температурасы 33 градуска чейин төмөндөп кеткен.

Азаттык

 

Бишкек, “Саясат.kg». Коргоо Кеңешинин отурумунда президент Алмазбек Атамбаев мамлекеттик бийликтин коррупцияга каршы жүргүзүп жаткан саясатын, аны менен күрөшүүнүн ыкмаларын жана жолдорун аныктап, талкууга салды.

Коррупциянын Кыргызстанга тийгизген залалын акчалай эсепке салганда, бул өнөкөт өлкөбүздү бир эле жылдын ичинде 30 миллиард сомдук жоготууга алып келгенин Кеңештин катчысы Бусурманкул Табалдиев билдирди. Мындан сырткары, учурда өлкөбүздө орун алган тымызын экономикада 130 миллиард сомго чейинки акча каражат айланып жатканын да жашырганы жок.

“Коррупция Кыргызстанды түп-тамырынан бери ээлеп, каныбызга сиңген илдет болуп калды”,- деген пикирге кошулбаган адам болбосо керек арабызда. “Жыгачтын жумшагын курт жейт, адамдын жумшагын адам жейт”, деген сөзгө, “коомдун жумшагын коррупция жейт” деп кошумча кылсак тура болчудай. Мындай дарттан кантип арылса болот, аны менен күрөшүүнүн ыкмалары барбы деги?

Барынан да кызыгы, коррупция менен күрөшүүнү коррупцияга белден батып, мамлекеттин казынасына беш саласын бирдей малып алган чиновниктердин колуна берип койгондорунда болуп жатпайбы. Бөрүгө кой кайтарткандай, бул маселеде жылт эткен жылыштарды күтсө болобу? Коррупцияга каршы күрөшүү керек  деген атка минерлердин сөзүнө кантип ишенсе болот. 20 жыл бою жеп-ичип, бюджетти тоноп, карапайым элдин эсебинен капчыктарын кампайткан адамдар бир күнү эле, уйкудан чочугансып келип, коррупцияны жок кылыаарына көз жетпейт.

«Кыргызстандын өкмөтүнүн өзү коррупцияга малынган болсо, коррупция менен күрөшүү жөнүндө кандай сөз болмок эле», деген оюн Коргоо Кеңешинин отурумунан кийин «Ата Журт» фракциясынын лидери Камчыбек
Ташиев билдирди. Анын айтымында, Президент Атамбаев коррупция менен күрөшүүгө чындап бел байлаганы билинип жатат, бирок ал аракеттер кагаз жүзүндө эле кала бербей, иш жүзүндө ашырылса жакшы болор эле. Ушуга чейин атту-баштуу аткаминерлердин бирөөсү да айыпталып, соттолгон эмес.

Кызматдарга дайындоолор дагы эле болсо таныш-билиш, тууган-урук, акчанын күчү менен бүтүп жатканын жашыруу кыйын. Демек, “коррупция өлмөк түгүл, өсүп-өнүп жатат”,- дейт Камчыбек Ташиев. Жөнөкөй, карапайым элдин арасынан чыккандардын илим-билимине карабастан бийликтин бутагына илиниши оңой эмес, бул да болсо коррупция.

Депутат Камчыбек Ташиевдин пикиринде, бүгүнкү өкмөттүн коррупцияга чыныгы каршылык көрсөтүүгө күчү да, мүмкүнчүлүгү да жок. Анткени өкмөттүн өзү коррупцияга белчесинен өйдө батып жатканы белгилүү. Өткөн жылы Өмурбек Бабановдун коррупциялык схемаларга аралышып калганы жөнүндө «Ата Мекен» фракциясы бир нече жолу айтып чыккан эле. Анан кантип ушундай күмөндөр чиновник коррупцияга каршы күрөшүүнү башкара алат.Коррупцияга каршы күрөшүү жемиштүү болушу үчүн президент мындай отоо чөптү түп-тамыры менен жулуп жок кылууга аракет кылышы зарыл. Мисалы, бүгүнкү өкүмөттү толугу менен отставка кетирип, парламенттик коалицияны кайрадан түзүп, жаңы өкмөт дайындалышы абзел. Ошондо гана коррупцияга каршы күрөштүн алгачкы кадамдары жасалды десе болот. Ага чейин, атка минерлер оң колу менен өтө чөп жулуп, сол колу менен пара алып жата бериши турган кеп.

Бирок Президенттин мындай радикалдуу кадамдарга күчү да, саясий эрки да жетер бекен? Же коррупция менен күрөшүү урааны элге арналган кезектеги «короз кант» бойдон кала береби?


                                     


 

Бир айдан бери унчукпай жаткан «Ата Журт» фракциясынын башчысы айдын аягында катуу ачылды, деп жазылат «Фабула» гезитинин 31-январда чыккан санында.

Басылмада бегиленгендей, 28-январда парламенттик отурумда Ө.Бабанов баш болгон, Тынаев төш болгон өкмөт мүчөлөрүн өкүртө сындады. Кичи мекенине иш сапары менен аттанган баш бакандын өкмөттүк саатка катышпаганына капаланган Камчыбек Ташиев «Ө.Бабанов убаданы катуу берет, аткарарда качып кетет», - деп атырылды.

Баракелде

 

30-январдан 31-январга караган түнү Мырзаке-Кара-Кулжа-Алайкуу автожолунда 21 жолу кар көчкү түштү. Мындай маалыматты бүгүн Унаа жана жол министрлигинин басма сөз кызматынан билдиришти.

Карташ жана Ойтал калктуу пункттарынын ортосундагы атожолдун 76-чакырымынан 89-чакырымына чейинки бөлүгүндө 6 жолу кар көчкү түшкөн. Мындай кар көчкүнүн көлөмү 3 миң 360 кубометрге жеткен. Ошондой эле Терекчат участогундагы автожолдун 100-чакырымынан 106-чакырымына чейинки бөлүгүндө жалпы көлөмү 12 миң 850 кубометр келген 15 жерге көчкү түшкөн.

Маалыматка ылайык, бул участоктордо автоунаалардын бир багытта жүрүшү үчүн жол тазаланды. Учурда жолду кардан тазалоо иштери уланууда.

Кабар

 

Кыргызстандын соттор кеңеши Фемида кызматкерлерин жоопко тартууга макулдугун берген чечим кабыл алды. Бул тууралуу «De-факто» гезити 31-январда чыккан санында жазган.

Гезитте жазылгандай, сот залында Октябрь районунун соту Мамасадык Абдыкалыковдун, Токтогул районунун соту Жунусмамат Эгембердиевдин жана Ноокат районунун соту Марс Исмановдун жооп берүүлөрү күтүлүп атат.

«Булардын баары УКМК тарабынан кызмат абалынан пайдаланып, ири көлөмдө пара алган деп айыпталууда. Кылган күнөөлөрү үчүн бул үч сот мыйзам чегинде тиешелүү жазаларын алышса, анда бул Кыргызстандагы сот реформасынын башталышынан кабар берген иш болмок», - деп жазат гезит.
 
Баракелде

 

 «De-факто» гезитинин 31-январда чыккан санында жазылгандай, «Кыргызалтын» ишканасынын жетекчисинин орду азырынча бош. Буга чейин жетектеп келген Осмонбек Артыкбаев жакында эле бошотулуп, башка кызматка кеткен.

«Ак үйдөгү ишенимдүү маалымат булагыбыз билдиргенге караганда, ал орунга КСДП партиясынын активдүү мүчөлөрүнүн бири, бир кезде бир жарым ай гана Чүйдүн губернатору болууга жетишкен Сагынбек Абдрахманов барат экен», - деп жазат гезит.

Гезит белгилегендей, С.Абдрахманов коомчулукка «С.Чокморов» атындагы коомдук фонддун жетекчиси катары белгилүү.

Баракелде  

 

Ысык-Көл облусунун губернатору Мирбек Асанакунов Чолпон-Ата шаарынын эли менен атайын жолугушуу өткөрдү, деп маалымдады обладминистрация басма сөз кызматы.

20-январда Чолпон-Ата шаарынын мэрин шайлоо болуп өтүп, шаардык кеңештин депуттары тарабынан көпчүлүк добуш менен Бактыгул Алиевдин талапкерлиги жактырылды. Бирок, кээ бир жаштар тарабынан «Биз Алиевди жакшы тааныбайбыз» деген ойлорун айтып, наарзычылык билдиришти. Бул маселе боюнча жеринде барып, жергиликтүү эл, аксакалдар, жаштар, район, шаар жетекчилери, участкалык комиссиянын төрагасы жана укук коргоо кызматкерлери менен биргеликте сүйлөшүп, аталган маселеге чекит коюу үчүн облус жетекчиси М.Асанакунов жеринде жолугушуу өткөздү.

Жолугушууга келген участкалык комиссиянын төрагасы депутаттар, шайлоо ачык-айкын жана мыйзам чегинде өткөнүн баса белгилешти. Ал эми жаштардын «биз аны жакшы тааныбайбыз» деген сөзүнө, шаар аксакалдары «мыйзам чегинде шайланган мэрге иштөөгө мүмкүнчүлүк берели» деген ойлорун ачык айтышты.

Ал эми облус жетекчиси губернатор Мирбек Асанакунов «Жаштар жергиликтүү жетекчилер менен биргеликте шаардын өнүгүп өсүшү үчүн биргеликте, ынтымакта иш алып барууларына чакырамын жана жаңы шайланган мэрди эл үчүн иштегенге мүмкүнчүлук берели, анан жалпыбыз бирге баалайлы», - деп айтты.
Натыйжада маселеге чекит коюп, шаар жетекчиси өз кызматына толук кандуу киришти.

  Баракелде

 

 Жогорку Кеңештин КСДП фракциясынын депутаты Исмаил Исаков М.Суталинов менен УКМК сүйлөшүп алган деди.

«М.Суталинов кайсы парашют менен түштү? Биздин комитетке М.Суталинов Казакстандын аймагында жүрөт деген маалымат түшкөн. Бирок чек арачылар Суталинов чек арадан өткөн жок деп жатышат. Анда ал асмандан түштү да», - деп суроо берди И.Исаков Чек ара кызматынын башчысына.

«УКМКда азыр кадрдык башаламан болуп жатат. Суталинов УКМК менен сүйлөшүп алган, ошондуктан ал келип отуруп калды. Ошондуктан, Суталинов боюнча Атахановду жоопкерчиликке тартуу керек. Чек арачылар Суталинов чек арадан өткөн жок деп жашырып жатышат. Аны такташ 3 күндү талап кылат», - деди ал.

  Баракелде